Uddhav-Raj Thackeray: 'तू परत ये.. मला भेटायला!', उद्धव ठाकरेंना 'शिवतीर्था'वर पुन्हा कोणी आणि का बोलावलेलं? अखेर आलं समोर!

संजय राऊत यांनी या भेटीबाबत माहिती देताना सांगितले की, 'राज ठाकरेंच्या निवासस्थानी आम्ही गेलो. त्यात कोणताही राजकीय कार्यक्रम नव्हता. काहीही राजकारण नव्हतं. सत्य असं आहे की, गणपतीच्या वेळेला उद्धवजी हे राज साहेबांच्या घरी गेले तेव्हा राज साहेबांच्या आई.. म्हणजे उद्धवजींच्या मावशी, काकी यांनी निघताना उद्धवजींना सांगितलं की, गर्दीमध्ये आपल्याला बोलता आलं नाही. तेव्हा तू परत ये.. मला भेटायला! त्यानुसार, मावशींना भेटायला, कुंदा मावशींना भेटायला.. राज साहेबांच्या आईंना भेटायला आज उद्धवजी राज साहेबांच्या घरी गेले. ते आज का भेटले हे मी तुम्हाला सत्य सांगितलं.. तुम्ही त्यावर विश्वास ठेवला पाहिजे. कारण मी सत्य सांगतोय.'

संजय राऊत यांनी पुढे स्पष्ट केले की, "या भेटीत कोणताही राजकीय कार्यक्रम नव्हता. राजकारणाचा याच्याशी काहीही संबंध नाही. ही पूर्णपणे कौटुंबिक भेट होती."

भेटीमागील राजकीय चर्चांना पूर्णविराम

उद्धव ठाकरे आणि राज ठाकरे यांच्या भेटीमुळे राजकीय वर्तुळात आणि माध्यमांमध्ये अनेक तर्कवितर्क लढवले जात होते. विशेषतः आगामी निवडणुकांच्या पार्श्वभूमीवर या भेटीकडे राजकीय अंगाने पाहिले जात आहे. मात्र, संजय राऊत यांनी या सर्व चर्चांना पूर्णविराम देताना ही भेट केवळ कौटुंबिक असल्याचे सांगितले. "लोकांनी यावरून राजकीय तर्क लढवू नयेत. ही भेट मावशी आणि भाच्यामधील नात्याचा भाग होती," असे राऊत यांनी नमूद केले.

हे ही वाचा>> Thackeray Brother: उद्धव ठाकरे 'या' नेत्याला सोबत घेऊन अचानक का गेले राज ठाकरेंच्या घरी?, 'शिवतीर्थ'वर बंद दाराआड कोणत्या चर्चा?

उद्धव ठाकरे आणि राज ठाकरे यांच्यातील कौटुंबिक नाते महाराष्ट्राच्या राजकारणात नेहमीच चर्चेचा विषय राहिले आहे. शिवसेना आणि मनसे या दोन पक्षांच्या वेगळ्या राजकीय विचारसरणी असल्या, तरी कुटुंबातील सदस्य म्हणून त्यांच्यातील बंध दृढ आहे. आजच्या भेटीने या नात्याची झलक पुन्हा एकदा पाहायला मिळाली. 

राजकीय वर्तुळात कोणत्या चर्चा?

2006 मध्ये राज ठाकरेंनी शिवसेनेतून बाहेर पडून मनसे स्थापन केली होती, त्यानंतर दोघांमध्ये राजकीय वैर निर्माण झाले. मात्र, गेल्या काही वर्षांत त्यांच्या संबंधांत सुधारणा दिसून येत आहे. जुलै 2025 मध्ये उद्धव ठाकरेंच्या वाढदिवसानिमित्त राज ठाकरेंनी 'मातोश्री'वर भेट घेतली होती, ज्यात दोघांनी एकत्र फोटोसेशन केले होते. वाढदिवसानिमित्तची ही भेट 20 वर्षांनंतरची पहिली भेट होती आणि त्याने राजकीय वर्तुळात चर्चा सुरू झाली होती.

हे ही वाचा>> ठाकरे ब्रँड एकत्र येऊनही ‘BEST’ दणका, BMC निवडणुकीवर काय परिणाम?

तर ऑगस्टमध्ये गणेशोत्सवानिमित्त झालेल्या भेटीत ठाकरे बंधूंनी 10 मिनिटे एकांतात चर्चा केली होती, या भेटींमुळे मनसे आणि शिवसेना (UBT) यांच्यात युती होण्याच्या शक्यतांना बळ मिळाले आहे.

दुसरीकडे आजची भेट ही जरी कौटुंबिक असली, तरी उद्धव ठाकरे आणि राज ठाकरे यांच्यासारख्या दोन प्रभावशाली नेत्यांची भेट राजकीय वर्तुळात चर्चेचा विषय ठरल्याशिवाय राहणार नाही. मात्र, संजय राऊत यांनी ही भेट राजकीय नसल्याचं स्पष्ट केलं आहे. तरीही, आगामी काळात या भेटीचे अनेक राजकीय अन्वयार्थ लावले जातील.