कसबा पोटनिवडणूक 2023 : पुन्हा कमळ फुलवण्यासाठी भाजपची ‘समिती’ रणनीती!

कसबा पेठ विधानसभा पोटनिवडणुकीसंदर्भात चंद्रकांत पाटील यांच्या घरी बैठक झाली. त्यानंतर चंद्रकांत पाटील यांनी माध्यमांशी संवाद साधला.

कसबा पेठ विधानसभा पोटनिवडणूक 2023 : 32 नेत्यांची चंद्रकांत पाटलांच्या घरी बैठक

माध्यमांशी बोलताना चंद्रकांत पाटील म्हणाले, “निवडणुकीचा कार्यक्रम जाहीर झाल्यानंतर सर्व पक्षांनी तयारी सुरू केली आहे. दोन्ही मतदारसंघ भाजपचे परंपरागत मतदारसंघ आहे आणि पुरेसा आधी विचार आणि पुरेसा खोल विचार करणं ही आमची कार्य पद्धती आहे. मतदारसंघ हक्काचेही असूनही आम्ही तयारीला लागलो आहोत.”

“ही निवडणूक केवळ कसब्याची नाही, पूर्ण शहराने ती निवडणूक स्वीकारली पाहिजे. त्यामुळे शहरातील 32 नेत्यांची माझ्या घरी बैठक झाली. माझ्या डोळ्याची शस्त्रक्रिया झाल्यानं मी सगळ्यांना विनंती केली की, माझ्या घरी बैठक बोलवावी लागली. कसब्यातील पक्ष कार्यालयात आमच्या पुढच्या बैठका होतील”, असंही चंद्रकांत पाटील यांनी सांगितलं.

कमळ चिन्ह हाच उमेदवार समजून प्रचाराला सुरूवात -चंद्रकांत पाटील

चंद्रकांत पाटील उमेदवाराबद्दल बोलताना म्हणाले, “या बैठकीत सांगोपांग विचार करण्यात आला. उमेदवारांची चर्चा सोडून ही चर्चा झाली. राज्याचं संसदीय मंडळ जो निर्णय घेईल, तो आम्हाला मान्य असेल. मात्र उमेदवार निश्चित होईलपर्यंत कमळ चिन्ह हाच उमेदवार समजून कामाला सुरूवात केली आहे”, असंही चंद्रकांत पाटील यांनी सांगितलं.

पोटनिवडणूक जिंकण्यासाठी भाजपची समिती रणनीती काय?

चंद्रकांत पाटील यांनी समित्यांच्या माध्यमातून प्रचार करणार असल्याची माहिती दिली. भाजपकडून तीन समित्या केल्या आहेत. एक आहे राजकीय समिती. या समितीमध्ये आमदार माधुरी मिसाळ प्रमुख आहेत. माजी खासदार संजय काकडे ते हेमंत रासने यांच्यापर्यंत एका समितीत असतील.

दुसरी आहे संघटनात्मक समिती. आमची सगळी ताकद बूथ प्रमुख, बूथ समिती आहे. शक्ती केंद्र प्रमुख शक्ती समिती आहे. असा सगळा संघटनात्मक ढाचा उभा करण्याचं काम आमचे शहराचे संघटन सरचिटणीस राजेश पांडे करतील. त्यांना शहराचे सरचिटणीस राजेश अंकुरे सहाय्यक म्हणून काम करतील.

तिसरी समिती वेगवेगळ्या कामाची असेल, ज्याला आम्ही निवडणूक संचालन समिती म्हणतो. कसबा विधानसभेचे आमचे अध्यक्ष प्रमोद कोंडरे हे त्या समितीचे प्रमुख असतील आणि 20 त्याचे विभाग आहेत. खातेप्रमुख असतील. गिरीश बापट यांच्या मार्गदर्शनाखाली ही निवडणूक होईल. शहराचे अध्यक्ष जगदीश मुळीक यांच्या नेतृत्वाखाली ही निवडणूक होईल.

भाजपचा परंपरागत मतदारसंघ असला, तरी मतांची आघाडी कशी वाढेल. महाविकास आघाडीचं सरकार जाऊन एकनाथ शिंदे आणि देवेंद्र फडणवीस यांचं सरकार आल्यानंतर विकासाच्या योजनांना वेग मिळाला. त्याचा परिणाम म्हणून अधिक मत मिळवण्याचा प्रयत्न होईल, असं चंद्रकांत पाटील यांनी यावेळी सांगितलं.

बिनविरोध निवडणूक होणार का? चंद्रकांत पाटील काय म्हणाले?

कसबा पेठ, चिंचवड विधानसभा मतदारसंघातील निवडणूक बिनविरोध होण्यासाठी प्रयत्न केले जाणार का? असा प्रश्न चंद्रकांत पाटलांना विचारण्यात आला होता. त्यावर बोलताना पाटील म्हणाले, ‘बिनविरोधसाठी आम्ही प्रयत्न करणारच. पण, असे प्रयत्न सुरू होण्यापूर्वीच महाविकास आघाडीच्या महान नेत्यांनी निवडणूक होणार, असं सूचित केलेलं आहे. तयारीला लागले आहेत. काही उमेदवारांनी पोस्टर्स लावणं सुरू केलं आहे. त्यामुळे बिनविरोधसाठी प्रयत्न करत असताना गाफील न राहता, निवडणूक होईल असं समजून आम्ही तयारीला लागलो आहोत”, अशी भूमिका पाटील यांनी मांडली.