हे ही वाचा :  मुंबईत महापौर होत नाही तोपर्यंत शिंदेंच्या शिवसेनेचं हॉटेल पॉलिटिक्स, नगरसेवकांचा पुढील 3 दिवसांचा मुक्काम ठरला!

स्वीकारलेल्या भूमिकेवर ठाम राहिल्यास मनसेचे भविष्य उज्ज्वल

25 वर्ष सत्तेत असताना भ्रष्टाचार आरोप आणि प्रचंड अँटी इन्कबन्सी असताना ठाकरेंना फक्त 12 जागा कमी मिळाल्या. तर राज ठाकरेंना 6 जागा मिळाल्या, राज ठाकरेंचा फायदा उद्धव ठाकरेंना नक्कीच झालाय मात्र उद्धव ठाकरेंच्या सेनेकडून राज ठाकरेंच्या मनसेकडे व्होट ट्रान्स्फर झालं का नाही? असा सवाल आहेच. आता ज्येष्ठ पत्रकार विजय चोरमारे सर म्हणतात तसे राज ठाकरे यांच्यासाठी ही नवी सुरुवात आहे. खूप झाली धरसोड. आता स्वीकारलेल्या भूमिकेवर ठाम राहून पुढे जायचे ठरवले तर भविष्य उज्ज्वल राहील. यावेळी भले मनसेला कमी जागा मिळाल्या असतील, पण उद्धव ठाकरेंना मिळालेल्या जागांमध्ये त्यांचा वाटा आहेच की! मुंबई महापालिकेसह महाराष्ट्रात मनसे आणि राष्ट्रवादी SP पेक्षा ओवैसींच्या AIMIM चा परफॉर्मन्स जोरदार राहिलाय. जास्त चांगला राह्यलाय. युती करून मनसेला फक्त 6 जागा मिळाल्या आहेत तर एकट्याने लढून AIMIM चे 9 उमेदवार मुंबईत निवडून आलेयत. मुस्लिम मतांचा गठ्ठा बांधण्यात 13 शहरांमध्ये ओवैसींना चांगलं यश मिळालं, अर्थात त्यामागे त्यांची मेहनतही आहेच. माध्यमांमध्ये कमी दिसले असले तरी ओवैसी यांनी स्वतः लक्ष घातलेलं सभाही घेतलेल्या. छत्रपती संभाजीनगरमध्ये इम्तियाज जलील यांची मेहनत कामाला आली.

काँग्रेसची समाधानकारक कामगिरी 

काँग्रेसनंही फार यंत्रणा नसताना आपली ताकद दाखवलीय आणि समाधानकारक कामगिरी केलीय, जी कार्यकर्त्यांचं बळ वाढवणारी नक्की आहे. प्रचारात फार कमी दिसत असतानाही, अपवाद वगळता कार्यकर्ते फार सक्रिय नसताना, स्टार प्रचारक-रोड शो-सभा असं काहीही न करता, मोठा नेता नसताना मुंबईत काँग्रेसचे 24 उमेदवार निवडून आले हे विशेष. शिवाय हर्षवर्धन सपकाळ यांच्या नेतृत्वाखाली राज्यभरात साडेतीनशेच्या जवळपास नगरसेवक निवडून आणलेत आणि तीन चार ठिकाणी महापौर काँग्रेसचा असण्याची शक्यता आहे. अर्थात काँग्रेसचं हे यश देखील स्थानिक नेतृत्वाच्या मेहनतीचं आहे.