रायगड हादरलं, शेजारणीने 2.5 वर्षांच्या चिमुकल्याला गळा आवळून संपवलं, कारण ऐकून तळपायाची आग मस्तकात जाईल

नैसर्गिक मृत्यू झाल्याचं सर्वांना सांगितलं, पण अखेर सत्य समोर आलं

घटनेदिवशी म्हणजे 9 नोव्हेंबर रोजी जयदीपचे आई-वडील गणेश वाघ आणि त्यांची पत्नी पुष्पा मजुरीसाठी बाहेर गेले होते. त्यांच्या अनुपस्थितीत जयदीप आणि त्याची भावंडे घरासमोर खेळत होती. त्याच वेळी शेजारी राहणारी जयवंता मुकणे हिने जयदीपला उचलून घराच्या मागील पायवाटेकडे नेले. संतापाच्या भरात तिने चिमुकल्याचा गळा आवळून त्याला ठार मारल्याचे तपासात निष्पन्न झाले. गुन्हा लपवण्यासाठी मुलगा अचानक बेशुद्ध पडल्याचा आणि नैसर्गिक मृत्यू झाल्याचा खोटा प्रसंग तिने उभा केला. मुलाला तातडीने कळंब रुग्णालयात नेले गेले, परंतु डॉक्टरांनी त्याला मृत घोषित केले. परिस्थितीवर विश्वास ठेवून कुटुंबाने परंपरेनुसार अंत्यसंस्कारही पूर्ण केले.

हेही वाचा : धुळे : पेढ्यातून गुंगीचे औषध दिलं, मुख्याध्यापकाचा महिलेवर अत्याचार, व्हिडीओ व्हायरल करतो म्हणत 60 लाख उकळले

पोस्टमॉर्टेमसाठी पुरलेला मृतदेह बाहेर काढला

परंतु एका नागरिकाच्या गुप्त माहितीमुळे पोलिसांच्या हातात महत्त्वाचा धागा लागला. नेरळ पोलिस ठाण्याचे अधिकारी शिवाजी ढवळे यांच्या मार्गदर्शनाखाली पोलिस पथकाने तात्काळ घटनास्थळी धाव घेतली. कर्जतचे तहसीलदार धनंजय जाधव यांच्या परवानगीने पुरलेला मृतदेह बाहेर काढण्यात आला आणि जे. जे. रुग्णालयात शवविच्छेदनासाठी पाठवण्यात आला. शवविच्छेदनात मुलाचा मृत्यू गळा दाबल्यामुळे झाल्याचे स्पष्ट झाले व पोलिसांचा संशय बळावला. तपासात आणखी एक धक्कादायक बाब समोर आली. घटनेच्या आदल्या दिवशी म्हणजे 8 नोव्हेंबरला जयवंता मुकणे हिने मृत मुलाच्या चार वर्षांच्या बहिणीलाही गळा आवळून ठार मारण्याचा प्रयत्न केला होता. त्या दिवशी परिस्थिती बिघडली आणि प्रयत्न असफल ठरला. दुसऱ्याच दिवशी तिने एकट्या पडलेल्या जयदीपवर हल्ला करून त्याचा जीव घेतला.