Thane: समृद्धी महामार्गावर पूल कोसळला, 17 जागीच ठार

बाळासाहेब ठाकरे मुंबई-नागपूर समृद्धी महामार्ग शिर्डीपर्यंत वाहतुकीसाठी खुला करण्यात आलेला आहे. उर्वरित मार्गाचं काम सुरु आहे. दरम्यान, ठाणे जिल्ह्यातील शहापूर तालुक्यात काम सुरु असतानाच दुर्दैवी घटना घडली.

समृद्धी महामार्गावर पूल कसा कोसळला?

मिळालेल्या माहितीनुसार, शहापूर तालुक्यात समृद्धी महामार्गावर उभारण्यात आलेल्या पुलावर मोठा क्रेन कोसळला. पुलाच्या ढिगाऱ्याखाली अनेक कामगार दाबले गेले. सोमवारी रात्री 11.30 वाजताच्या सुमारास ही घटना घडली.

वाचा >> Firing: ‘ये सब PAK से ऑपरेट हैं…’, जयपूर-मुंबई ट्रेनमधील ‘तो’ व्हिडिओ व्हायरल

घटनेची माहिती मिळताच एनडीआरएफचे जवान घटनास्थळी दाखल झाले. तातडीने मदत व शोध मोहीम हाती घेण्यात आली. जवानांना ढिगाऱ्याखाली 14 जणांचे मृतदेह आढळून आले. तर 3 जणांना जखमी अवस्थेत बाहेर काढण्यात आले आहे. अजूनही ढिगारा हटवण्याचं काम सुरूच असून 6 जण अडकले असण्याची शक्यता व्यक्त करण्यात आलीये, त्यामुळे मृतांचा आकडा वाढण्याची भीती व्यक्त करण्यात आली आहे.

वाचा >> Sambhaji Bhide: गांधी, फुले ते साईबाबा, भिडेंनी कुणालाच सोडलेलं नाही, तरीही…

सुप्रिया सुळे यांनी व्यक्त केला शोक

राष्ट्रवादी काँग्रेसच्या खासदार सुप्रिया सुळे यांनी दुर्घटनेत मृत्युमुखी पडलेल्यांना श्रद्धांजली अर्पण केलीये. “शहापूर, ठाणे येथे गर्डर कोसळून मोठी जीवितहानी झाली. समृद्धी महामार्गाच्या तिसऱ्या टप्प्याचे काम सुरू असताना हा अपघात झाला. ही घटना अतिशय दुर्दैवी व दुःखद असून,या घटनेत मृत्युमुखी पडलेल्यांना भावपूर्ण श्रद्धांजली. जखमींवर उपचार सुरु असून ते सुखरुप घरी परत यावे ही ईश्वरचरणी प्रार्थना”, अशा शब्दात सुप्रिया सुळे यांनी शोक व्यक्त केला आहे.