मोठी बातमी : फलटणच्या महिला डॉक्टर आत्महत्या प्रकरणातील एका आरोपीला पोलिसांनी उचललं, PSI अजूनही फरार
Satara doctor suicide case : तपासादरम्यान प्रशांत बनकर याने मृत डॉक्टरांशी सतत संपर्क साधला असल्याचे कॉल रेकॉर्ड्समधून उघड झाले होते
ADVERTISEMENT
बातम्या हायलाइट
महिला डॉक्टर आत्महत्या प्रकरणातील एका आरोपीला पोलिसांकडून अटक
दुसरा आरोपी पीएसआय बदने अजूनही फरार
Satara doctor suicide case : फलटण उपजिल्हा रुग्णालयातील महिला डॉक्टरच्या आत्महत्येप्रकरणी तपासाला वेग आलाय. फरार असलेला आरोपी प्रशांत बनकर याला सातारा पोलिसांनी अखेर अटक केली आहे. या प्रकरणातील दुसरा आरोपी पीएसआय बदने अजूनही फरार असून, त्याचा शोध पोलिसांकडून सुरू आहे. फलटणमधील ही आत्महत्येची घटना काल समोर आली होती. मृत डॉक्टर महिलेने फलटण शहरातील एका हॉटेलमध्ये गळफास घेऊन आत्महत्या केली होती. या प्रकरणाने संपूर्ण सातारा जिल्हा हादरला होता. तपासादरम्यान मृत डॉक्टरांनी आत्महत्येपूर्वी हातावर लिहिलेल्या सुसाईड नोटमध्ये आरोपी प्रशांत बनकर याने मानसिक आणि शारीरिक छळ केल्याचा थेट उल्लेख केल्याचं समोर आलं होतं.
प्रशांत बनकर याला पोलिसांनी ठोकल्या बेड्या
घटनेनंतर फलटण शहर पोलिसांनी या प्रकरणी गुन्हा दाखल करून दोन आरोपींविरोधात शोधमोहीम सुरू केली होती. सातारा एलसीबी (स्थानिक गुन्हे अन्वेषण शाखा) आणि फलटण पोलिसांच्या दोन पथकांना तपासासाठी रवाना करण्यात आलं होतं. त्यानंतर आज अखेर प्रशांत बनकर याला पोलिसांनी ठोकल्या बेड्या आहेत. या अटकेनंतर संपूर्ण प्रकरणाचा तपास निर्णायक टप्प्यावर पोहोचला आहे.
दरम्यान, आत्महत्येच्या दिवशी मृत डॉक्टरांनी हॉटेलमध्ये सायंकाळी सातच्या सुमारास रूम घेतली होती. त्या एकट्याच आत गेल्या होत्या. रात्री आठ वाजल्याच्या सुमारास त्यांच्या बहिणीचा सतत फोन लागत होता, मात्र प्रतिसाद मिळत नव्हता. त्यानंतर हॉटेलच्या कर्मचाऱ्यांनी दरवाजा उघडल्यावर डॉक्टर गळफास घेतलेल्या अवस्थेत आढळल्या. पोलिसांनी घटनास्थळावरून सुसाईड नोट, मोबाईल आणि इतर पुरावे जप्त केले होते.
प्रशांत बनकरचे पीडित महिला डॉक्टरला सर्वाधिक कॉल
तपासादरम्यान प्रशांत बनकर याने मृत डॉक्टरांशी सतत संपर्क साधला असल्याचे कॉल रेकॉर्ड्समधून उघड झाले होते. त्याने सर्वाधिक कॉल्स आणि व्हॉट्सअॅप चॅटिंग मृत डॉक्टरांशी केल्याचं समोर आलं होतं. यातील काही चॅट्स डिलीट करण्यात आले होते, मात्र पोलिसांनी फॉरेन्सिक तपासाद्वारे ते चॅट पुन्हा प्राप्त करण्याची प्रक्रिया सुरू केली होती.
या प्रकरणानंतर फलटणमध्ये मोठा राजकीय तणाव निर्माण झाला होता. राष्ट्रवादी काँग्रेस (अजित पवार गट) चे ज्येष्ठ नेते रामराजे नाईक निंबाळकर यांनी या घटनेचा तीव्र निषेध व्यक्त करत दोषींवर कठोर कारवाई करण्याची मागणी केली होती. “फलटणची बदनामी झाली आहे, सत्य बाहेर यायलाच हवं,” असे त्यांनी ठणकावून सांगितले होते.
सध्या पोलिसांनी आरोपी प्रशांत बनकरला ताब्यात घेऊन चौकशी सुरू केली आहे. सुसाईड नोट, कॉल रेकॉर्ड्स आणि फॉरेन्सिक रिपोर्टच्या आधारे या प्रकरणात आणखी काही महत्त्वाचे खुलासे होण्याची शक्यता आहे. फलटणमधील महिला डॉक्टरच्या आत्महत्येने वैद्यकीय क्षेत्रासह संपूर्ण साताऱ्याला हादरवून सोडलं आहे. प्रशांत बनकरच्या अटकेनंतर आता या प्रकरणातील सत्य उघडकीस येण्याची आणि न्याय मिळण्याची अपेक्षा सर्वत्र व्यक्त केली जात आहे.
इतर महत्त्वाच्या बातम्या