संपत्तीच्या लोभातून सोलापूर हादरले; सख्ख्या काकानेच केला कुटुंबातील तिघांचा खून
Solapur Crime News : सोलापूर जिल्ह्यात संपत्तीच्या वादातून काकानेच आपल्या कुटुंबातील तिघांची तलवारीने वार करून निर्घृण हत्या केल्याची धक्कादायक घटना घडली आहे.
ADVERTISEMENT
बातम्या हायलाइट
संपत्तीच्या लोभातून सोलापूर हादरले
सख्ख्या काकानेच केला कुटुंबातील तिघांचा खून
Solapur Crime News : सोलापूर जिल्ह्यातील दक्षिण सोलापूर तालुक्यातील एका अत्यंत धक्कादायक आणि थरारक घटनेने संपूर्ण परिसर हादरून गेला आहे. संपत्तीच्या वादातून सख्ख्या काकानेच आपल्या भावाच्या कुटुंबावर रक्तरंजित हल्ला करत तिघांची निर्घृण हत्या केल्याची संतापजनक घटना गुरुवारी मध्यरात्री घडली. या अमानुष घटनेत गायत्री सुधाकर मस्के, त्यांची मुलगी प्रिया मस्के आणि मुलगा शिवराज मस्के या तिघांचा मृत्यू झाला असून एकाच कुटुंबातील तीन सदस्यांचा अंत झाल्याने गावात भीती आणि संतापाचे वातावरण निर्माण झाले आहे. नात्याला काळिमा फासणाऱ्या या प्रकारामुळे संपूर्ण सोलापूर जिल्ह्यात खळबळ उडाली असून नागरिकांमधून या घटनेचा तीव्र निषेध व्यक्त केला जात आहे.
25 लाखांचा तगादा आणि शेतीची वाटणी; वादाचे रूपांतर रक्तरंजित संघर्षात
मिळालेल्या माहितीनुसार, मयत गायत्री मस्के आणि मुख्य आरोपी शंकर उर्फ पप्पू मस्के यांच्यात मागील दोन ते तीन महिन्यांपासून शेतीच्या वाटणीवरून सातत्याने वाद सुरू होता. या संपत्तीच्या वादाव्यतिरिक्त गायत्री मस्के यांनी आरोपी शंकरला हातउसने दिलेले 25 लाख रुपये परत मिळवण्यासाठी त्याच्याकडे तगादा लावला होता. याच कारणांवरून आरोपीच्या मनात राग होता आणि गुरुवारी मध्यरात्री या वादाचे रूपांतर भीषण हत्याकांडात झाले. रागाच्या भरात असलेल्या आरोपीने धारदार तलवारीने गायत्री, प्रिया आणि शिवराज यांच्यावर सपासप वार केले, ज्यामध्ये या तिघांचाही जागीच जीव गेला.
सहा जणांवर गुन्हा दाखल; मुख्य आरोपी शंकर मस्के अद्याप फरार
या तिहेरी हत्याकांड प्रकरणी मुख्य आरोपी शंकर उर्फ पप्पू मस्के याच्यासह एकूण सहा जणांविरोधात सोलापूर तालुका पोलीस ठाण्यात रीतसर गुन्हा दाखल करण्यात आला आहे. घटनेची माहिती मिळताच पोलिसांनी तातडीने घटनास्थळी धाव घेत पंचनामा केला, मात्र मुख्य आरोपी शंकर मस्के हा गुन्हा केल्यापासून अद्याप फरार आहे. पोलिसांनी या प्रकरणातील इतर संशयितांची चौकशी सुरू केली असून गुन्ह्यात वापरलेली शस्त्रे आणि इतर पुरावे गोळा करण्याचे काम युद्धपातळीवर सुरू आहे. आरोपीने ज्या क्रूरतेने हे हत्याकांड घडवून आणले आहे, ते पाहून खुद्द पोलीस प्रशासनही चक्रावून गेले आहे.
