आधी नर्स म्हणून काम करायची, नंतर...

केरळच्या उत्पादन शुल्क विभागाने 'ऑपरेशन थंडर' अंतर्गत ही धडक कारवाई करत तस्करांच्या या नवनवीन क्लृप्तीचा भांडाफोड केला आहे. या कारवाईत पोलिसांनी सरिता (वय 30) आणि तिचा साथीदार मोहम्मद शफी (वय 29) या दोघांना अटक केली आहे. पूर्वी सरिता होम नर्स म्हणून काम करत होती, तर शफी इंटीरियर डिझायनर होता. अधिकाऱ्यांनी त्यांच्याकडून एकूण 94.032 ग्रॅम 'एमडीएमए' जप्त केले असून, आंतरराष्ट्रीय बाजारात याची किंमत लाखो रुपयांच्या घरात आहे. हे दोन्ही आरोपी बंगळुरूहून मोठ्या प्रमाणावर अमली पदार्थ खरेदी करायचे आणि एरनाकुलम तसेच अलाप्पुझा येथील लॉजमध्ये खोल्या भाड्याने घेऊन तेथून अंमली पदार्थांची विक्री करायचे.

हे ही वाचा : 26 महिन्यांपूर्वी पतीची हत्या करुन गाडलं, दृश्यम स्टाईल मर्डर कसा आला उघडकीस?

'अशी' अडकली जाळ्यात

मिळालेल्या गुप्त माहितीच्या आधारे उत्पादन शुल्क विभागाचे पथक गेल्या काही आठवड्यांपासून या दोघांवर बारीक लक्ष ठेवून होते. कारवाई दरम्यान पथकाने प्रथम मोहम्मद शफीला दक्षिण एरनाकुलम येथील एका लॉजमधून ताब्यात घेतले, जिथे त्याच्याकडून 65.27 एमडीएमए जप्त करण्यात आले. चौकशीत असे समोर आले की, बंगळुरूहून बसने प्रवास करत असताना कन्नूर जिल्ह्यातील इरिट्टी येथे तपासणी झाली, तेव्हा शफीने आपल्या जवळील ड्रग्ज फेकून दिले होते. परंतु, सरिताने मेंस्ट्रुअल कपमध्ये एमडीएमए भरून, त्याचे एक टोक डिंकाने सील करून ते शरीराच्या आत लपवले असल्याने तपासणीदरम्यान ते सापडले नाही आणि ती सुखरूप निसटली.

हे ही वाचा : 2 महिने फोन बंद, टेन्शननं अ‍ॅडमिट, अभिजित दिल्लीत; आई-वडिलांनी कसे काढले दिवस?

प्रति ग्रॅम 4000 रुपयांनी विक्री

यानंतर सरिता उरलेले ड्रग्ज विकण्यासाठी अलाप्पुझा येथे गेली होती. उत्पादन शुल्क अधिकाऱ्यांनी ती परत येण्याची वाट पाहिली आणि रात्री 9:30 च्या सुमारास तिला अटक केली. तिच्या सांगण्यावरून अलाप्पुझा येथील एका घरातून आणखी 28.76 ग्रॅम एमडीएमए हस्तगत करण्यात आले. दोन्ही आरोपी हे एमडीएमए प्रति ग्रॅम 4000 रुपये दराने विकत असत.