Crime : ATM मशीनला धक्काही नाही पण बँकेला लाखो रुपयांचा चुना…

याबाबत पोलिसांकडून मिळालेली अधिक माहिती अशी की, वाशिम अर्बन को-ऑपरेटिव्ह बँक ‘एटीएम’मधून सात लाख रुपयांपेक्षा जास्त रक्कम काढण्यात आली आहे. ही रक्कम काढताना संशयित आरोपी एटीएममधून पैसे निघताना Dispensing Shutter ठिकाणी दोन बोट आडवी ठेवून त्याच्या साह्याने वितरण यंत्रणेच्या रोलसिलला आत ढकलायचे आणि मशीनमध्ये बिघाड करायचे. त्यामुळे मशीन तांत्रिक बिघाड गृहीत धरुन आरोपींना प्रत्यक्षात रक्कम मिळाली तरी त्यांच्या खात्यातून रक्कम वजा होत नव्हती.

दरम्यान, या गुन्ह्यासाठी आरोपींनी वेगवेगळ्या दहा बँकेचे स्वतःच्या खात्याचे वीस ‘एटीएम’कार्ड वापरल्याचं समोर आलं आहे. मुख्य संशयित आरोपी अरविंद कुमार अवस्थी (रा. कानपूर, उत्तर प्रदेश) हा त्याच्या जवळचे वेगवेगळे एटीएम कार्ड इतर आरोपींना देऊन परराज्यातील मशीन्समधून पैसे काढण्यास सांगत असे.

तपास करतेवेळी पोलिसांना आढळून आलेले सीसीटीव्ही फुटेज, आरोपींचे बँक अकाउंट नंबर्स आणि त्याला संलग्न असलेले इतर मोबाईल नंबर्स यावरून आरोपी पकडण्यात आले. वाशिम अर्बन को-ऑपरेटिव्ह बँकेने शहर पोलीस स्टेशनमध्ये दिलेल्या तक्रारीवरुन सर्व आरोपींविरुद्ध भारतीय दंड संहिता कलम 420 आणि माहिती तंत्रज्ञान कायद्यान्वये गुन्हा दाखल करण्यात आला आहे.