Lok Sabha 2024 : "माझा मुलगा तुम्हाला सोपवतेय", सोनिया गांधी झाल्या भावूक

हे शब्द आहेत, काँग्रेसच्या माजी अध्यक्ष सोनिया गांधी यांचे! सोनिया गांधी यांनी शुक्रवारी रायबरेलीत एका जाहीर सभेला संबोधित केले. यावेळी त्या भावूक झाल्या. 

सोनिया गांधींनी  लोकांना भावनिक आवाहन केले. लोकसभा निवडणुकीच्या पार्श्वभूमीवर काँग्रेसने राहुल गांधींना रायबरेलीमधून उमेदवारी दिली आहे.

हेही वाचा >> पत्रकार परिषद घेत नाही कारण...; अखेर मोदींनी दिलं उत्तर 

केरळमधील वायनाडशिवाय राहुल गांधी उत्तर प्रदेशातील रायबरेली मतदारसंघातूनही निवडणूक लढवत आहेत. शुक्रवारी जाहीर सभेदरम्यान सोनिया गांधी प्रचारसभेत भाषण करत असताना त्यांच्यासोबत कन्या प्रियांका गांधी आणि राहुल गांधीही मंचावर उभे होते.

तुमच्या प्रेमाने मला कधीच एकटे वाटू दिले नाही : सोनिया गांधी

रायबरेली येथे उपस्थित जनसमुदायाला संबोधित करताना काँग्रेस नेत्या सोनिया गांधी म्हणाल्या, "माझी ओटी तुमच्या प्रेमाने आणि आशीर्वादाने आयुष्यभर भरून राहिली. तुमच्या प्रेमाने मला कधीही एकटं पडू दिलं नाही. माझ्याकडे जे काही आहे, ते आपण दिलेले आहे. मी माझा मुलगा सोपवत आहे. तुम्ही जसं मला आपलं मानलं, तसंच राहुललाही तुमचा म्हणून सांभाळा. राहुल तुम्हाला निराश करणार नाही."

माजी पंतप्रधान इंदिरा गांधींचाही करण्यात आला उल्लेख 

यावेळी सोनिया गांधी यांनी माजी पंतप्रधान इंदिरा गांधी यांचाही उल्लेख केला. सोनिया गांधी म्हणाल्या, 'इंदिराजींच्या मनात रायबरेलीसाठी विशेष स्थान होते. मी त्यांना जवळून काम करताना पाहिले आहे. त्याचं तुमच्या अपार प्रेम होतं. इंदिराजी आणि रायबरेलीच्या लोकांनी मला जी शिकवण दिली आहे, तीच मी राहुल आणि प्रियांकाला दिली आहे. सर्वांचा आदर करा, दुर्बलांचे रक्षण करा. अन्यायाविरुद्ध जनतेच्या हक्कांचे रक्षण करण्यासाठी तुम्हाला कुणाशीही लढावे लागले तरी लढा... घाबरू नका... कारण तुमची संघर्षाची मुळे आणि परंपरा खूप मजबूत आहेत."

गांधी घराण्याची परंपरागत जागा

पहिल्या लोकसभा निवडणुकीत फिरोज गांधी यांनी रायबरेलीमधून निवडणूक लढवली होती. काँग्रेसचे तत्कालीन ज्येष्ठ नेते रफी अहमद किडवई यांनी फिरोज गांधी यांना रायबरेली मतदारसंघातून निवडणूक लढवण्यास सांगितले होते.

हेही वाचा >> अजितदादा नॉट रिचेबल भुजबळ नाराज, तटकरे-पवार भेटीच्या चर्चा; राष्ट्रवादीत काय सुरु?

स्वीडिश लेखक बर्टील फॉल्क यांच्या 'फिरोज : द फॉरगॉटन गांधी' या पुस्तकात याचा उल्लेख आहे. रायबरेली ही जागा नेहरू-गांधी घराण्याची परंपरागत जागा आहे. फिरोज गांधींपासून इंदिरा गांधींपर्यंत अरुण नेहरू आणि सोनिया गांधी या मतदारसंघातून संसदेत पोहोचले होते. आता सोनिया गांधी राजस्थानमधून राज्यसभेत गेल्या आहेत. यावेळी राहुल गांधी रायबरेली मतदारसंघातून उमेदवार आहेत.