Lok Sabha elections 2024: शिवसेनेच्या दिग्गज नेत्याचं कापलं तिकीट; शिंदेंनी गमावली जागा...

अमरावती लोकसभा मतदारसंघात अपक्ष खासदार नवनीत राणा या होत्या. पण तरीही शिवसेनेकडून सातत्याने या जागेवर दावा सांगितला जात होता. पण नवनीत राणा या भाजपमध्ये येण्यास आधीपासूनच उत्सुक होत्या. त्यामुळे त्यांनाच पक्षात घेत भाजपने अमरावतीची जागा शिवसेनेकडून अक्षरश: हिसकावून घेतली. 

भाजपच्या या निर्णयामुळे शिवसेना नेते आणि माजी खासदार आनंदराव अडसूळ यांना मोठा धक्का बसला आहे. कारण त्यांनाच पराभूत करून नवनीत राणा या निवडून आल्या होत्या. एकनाथ शिंदेंनी बंड केल्यानंतर आनंदराव अडसूळ हे देखील ठाकरेंना सोडून शिंदेंच्या गटात गेले होते. तेव्हापासूनच ते अमरावतीच्या जागेसाठी आग्रही होते. पण आता भाजपने आनंदराव अडसूळ यांचं तिकीट कापून विद्यमान खासदार नवनीत राणांवरच विश्वास दाखवला आहे.

हे ही वाचा>> मविआमध्ये शिवसेनाच (UBT) मोठा भाऊ, पण महायुतीत शिंदे...

शिवसेनेने 2019 साली युतीत ज्या जागा लढवल्या होत्या त्याच जागा त्यांना मिळाव्यात असा आग्रह भाजपकडे धरण्यात आला होता. मात्र, भाजपने त्यांचा आग्रह पुरवला नाही. कमळ चिन्हावर जास्तीत उमेदवारांनी निवडणूक लढवावी असा भाजपचा प्रयत्न आहे. त्यामुळेच अमरावतीसारखा मतदारसंघ देखील भाजपने स्वत:कडे खेचून घेतला.