ड्रग्स केसमध्ये आर्यन खान अटकेत, शाहरुखला आधार देण्यासाठी सलमान गेला ‘मन्नत’वर

जेव्हा सलमान खान हा शाहरुखला भेटण्यासाठी त्याच्या मन्नत बंगल्याजवळ गेला तेव्हा तेथे उपस्थित असणाऱ्या पत्रकारांनी त्याच्याशी संवाद साधण्याचा प्रयत्नही केला मात्र सलमान काहीही न बोलता थेट बंगल्यात शिरला. रात्री उशिरा झालेल्या या भेटीत नेमकं काय बोलणं हे मात्र समजू शकलेलं नाही.

शाहरुख खानचं कुटुंब हे प्रचंड तणावाखाली असल्याने सलमान आपल्या मित्राला आधार देण्यासाठी गेला असल्याचे बोलले जात आहे. सोशल मीडियावर देखील याबाबत वेगवेगळे अंदाज वर्तवले जात आहेत. परंतु दोघांपैकी कोणत्याही कलाकाराने या भेटीबाबत अधिकृत निवेदन दिलेले नाही.

सलमान आणि शाहरुख यांच्यात मैत्री आहेच. व्यावसायिक संबंध फारसे चांगले नसले तरी वैयक्तिकदृष्ट्या हे दोघेही एकमेकांचे चांगले मित्र आहेत. अशा परिस्थितीत चाहते सलमानच्या या भेटीला शाहरुखसोबतच्या त्याच्या ‘मैत्री’शी जोडत आहेत. या दोन्ही कलाकारांच्या प्रत्येक चाहत्याला असं वाटतं की, सलमान खान हा शाहरुखच्या कठीण काळात त्याला साथ देण्यासाठी आला आहे.

ड्रग्स केसमध्ये काय सुरु आहे?

ड्रग्ज केस प्रकरणी एनसीबीने आर्यन खानला काल (3 ऑक्टोबर) चौकशीनंतर अटक केली होती. आर्यनचे ड्रग्ज तस्करांशी संबंध असल्याचे तपासात उघड झाल्याचा आरोप एनसीबीकडून करण्यात आला होता. तसेच त्याने ड्रगचे सेवन केल्याचं देखील आरोपात म्हटलं होतं. जेव्हा एनसीबीने आर्यनचा फोन जप्त केला तेव्हा त्यांना अनेक ठोस पुरावे मिळाले.

Cruise Drugs Party: आर्यन खानचा ‘तो’ मित्र अरबाज मर्चंट कोण आहे?, ज्याला सुहानाही करते फॉलो

त्याच पुराव्याच्या आधारे आर्यनला अनेक प्रश्न विचारण्यात आले. तेव्हा त्याला या प्रश्नांची उत्तरं देणं कठीण गेलं. त्यानंतर वैद्यकीय चाचणी करुन आर्यनला मुंबईतील किला कोर्टासमोर नेण्यात आलं. जिथे कोर्टाने त्याच्यासह तिघांना 1 दिवसाची NCB कस्टडी सुनावली.