Maharashtra Violence : अमरावतीत चार दिवस कर्फ्यू; शहरातील इंटरनेट सेवाही बंद

अमरावतीत शुक्रवारी झालेल्या हिंसक घटनेच्या निषेधार्थ भाजपाने शुक्रवारी बंदची हाक दिली. मात्र, बंदला हिंसक वळण लागलं. दुपारपर्यंत शहरात अनेक ठिकाणी दगडफेक आणि जाळपोळीच्या घटना घडल्या. त्यानंतर अतिरिक्त फौजफाटा तैनात करण्यात आला. त्याचबरोबर पालकमंत्र्यांसह अधिकाऱ्यांनी शहरातील विविध भागांना भेटी देत नागरिकांना धीर दिला. त्याचबरोबर अफवांवर विश्वास न ठेवण्याचं आवाहन केलं.

Maharashtra violence : अमरावतीत पुन्हा हिसेंचा भडका; दगडफेक-जाळपोळ, संचारबंदी लागू

दरम्यान, सलग दुसऱ्या दिवशीही हिंसेचा भडका उडाल्यानं अमरावती प्रशासनानं सोशल मीडियावरून पसरणाऱ्या अफवा रोखण्यासाठी खबरदारीचं पाऊल म्हणून इंटरनेट सेवा बंद करण्याचा निर्णय घेतला. जिल्हा प्रशासनाच्या आदेशानंतर दूरसंचार कंपन्यांनी पोलीस आयुक्तालयाच्या हद्दीतील इंटरनेट सेवा बंद केली. पुढील तीन दिवस शहरातील इंटरनेट सेवा बंद राहणार असल्याचं शहराच्या पोलीस आयुक्त आरती सिंह यांनी सांगितलं.

दंगल, हिंसाचाराचा सर्वांत जास्त परिणाम महिला आणि लहान मुलांच्या मानसिकतेवर होतो. आज शहरात विविध ठिकाणी जाऊन लहान मुलं आणि महिलांशी चर्चा केली, त्यांना आधार दिला. सर्वांना सुरक्षित वाटलं पाहिजे, अशी स्थिती निर्माण करणे गरजेचे आहे. #AmravatiUnderControl #Amravati pic.twitter.com/69VX38Y5IO

— Adv. Yashomati Thakur (@AdvYashomatiINC) November 13, 2021

दरम्यान, इंटरनेट सेवा बंद करण्याबरोबर शहरातील परिस्थिती पूर्वपदावर आणण्यासाठी प्रशासनाने शनिवारी (१३ नोव्हेंबर) कर्फ्यू (कलम १४४) लागू केला. परिस्थितीचा आढावा घेतल्यानंतर पुढील चार दिवस कर्फ्यू कायम ठेवण्याचा निर्णय घेण्यात आला आहे. पोलीस आयुक्त आरती सिंह यांनी याची माहिती दिली.

Maharashtra Violenc: दोषींवर कठोर कारवाई करणार; गृहमंत्र्यांचा हिंसा करणाऱ्यांना इशारा

पालकमंत्र्यांची सर्वधर्मीय नेत्यांशी चर्चा

शनिवारीही अमरावती शहरात हिंसेचा उद्रेक झाल्यानं पालकमंत्री यशोमती ठाकूर यांनी पोलीस आणि जिल्हा प्रशासनासोबत चर्चा केली. त्याचबरोबर शहरातील तणाव निवळण्यासाठी आणि शांतता प्रस्थापित करण्यासाठी सर्व धर्मीय नेत्यांशी चर्चा केली. त्याचबरोबर कायदा सुव्यवस्थेसंदर्भात झालेल्या बैठकीतही पालकमंत्री यशोमती ठाकूर यांनी सर्व पक्षीय नेत्यांना शांतता प्रस्थापित करण्याबद्दल आवाहन केलं.

अमरावतीत शांतता प्रस्थापित व्हावी यासाठी शांतता समिती चीं बैठक घेण्यात आली. अमरावतीतील जनजीवन सुरळीत व्हायला पाहिजे, शांतता भंग कऱण्याचे प्रयत्न खपवून घेतले जाणार नाहीत, पोलिस प्रशासनाला सहकार्य करावे असं आवाहन यानिमित्ताने मी सर्वांना करत आहे. #AmravatiUnderControl #Amravati pic.twitter.com/fUd5Re3DOC

— Adv. Yashomati Thakur (@AdvYashomatiINC) November 13, 2021

शनिवारी काय झालं?

शुक्रवारी झालेल्या हिंसक घटनेचा निषेध करण्यासाठी भाजपानं बंद पुकारण्याचं आवाहन केलं. राजकमल चौकात दोन्ही बाजूचा जमाव आमने-सामने आला. त्यानंतर काही वेळातच दोन्ही गटांनी एकमेकांच्या दिशेनं दगडफेक करण्यास सुरूवात केली. हिंसक झालेल्या जमावाला पांगवण्यासाठी पोलिसांनी अश्रुधुराच्या नळकांड्या फोडत लाठीमार केला. यावेळी काही समाजकंटकांनी दुकानांना आग लावल्याचाही प्रकार घडला.