भयंकर.. नागपूरच्या नायब तहसीलदारांना JCB ला लटकवलं अन् 4 किलोमीटर नेलं फरफटत
Nagpur Crime : नागपूरच्या कुही तालुक्यात अवैध मुरूम उत्खननावर कारवाई करण्यासाठी गेलेल्या नायब तहसीलदारांना चक्क चालत्या जेसीबीला 3-4 किलोमीटरपर्यंत लटकवून नेल्याचा धक्कादायक प्रकार उघडकीस आला आहे.
ADVERTISEMENT
बातम्या हायलाइट
नायब तहसीलदारांना चालत्या जेसीबीला लटकवून 4 किलोमीटरपर्यंत नेले
कुही तालुक्यातील बोरी नाईक परिसरात मुरूम माफियांनी महसूल पथकावर केला हल्ला
Nagpur Crime: नागपूर जिल्ह्यातील कुही तालुक्यात महसूल विभागाच्या अधिकाऱ्यावर झालेल्या जीवघेण्या हल्ल्याने संपूर्ण जिल्ह्यात खळबळ उडाली आहे. कुही तालुक्यातील बोरी नाईक परिसरात 5 मे रोजी मध्यरात्री 11:30 च्या सुमारास अवैध मुरूम उत्खनन करणाऱ्या माफियांनी महसूल पथकावर हा हल्ला केला. या परिसरात मोठ्या प्रमाणावर अवैध उत्खनन सुरू असल्याची गुप्त माहिती मिळाल्यानंतर नायब तहसीलदार बुद्धभूषण निकाळजे आपल्या पथकासह कारवाईसाठी घटनास्थळी पोहोचले होते. मात्र, कायद्याचा कोणताही धाक न बाळगता मुरूम माफियांनी चक्क नायब तहसीलदारांच्या जीवावर उठण्याचा प्रयत्न केला, ज्यामुळे प्रशासकीय वर्तुळात संतापाची लाट उसळली आहे.
जेसीबी न थांबवता तहसीलदारांना लटकवले; थरारक पाठलाग आणि माफ्यांचा धुमाकूळ
कारवाईच्या दरम्यान नायब तहसीलदार बुद्धभूषण निकाळजे यांनी अवैध उत्खनन करणारा जेसीबी थांबवण्याचा प्रयत्न केला असता, चालकाने वाहन न थांबवता त्याचा वेग वाढवला. यावेळी निकाळजे यांनी जेसीबीला रोखण्याचा प्रयत्न केला असता त्यांना चालत्या जेसीबीला लटकवून तब्बल 3 ते 4 किलोमीटरपर्यंत नेण्यात आले. माफियांनी त्यांना गंभीर दुखापत करण्याचा आणि जेसीबीवरून पाडण्याचा जाणीवपूर्वक प्रयत्न केला. हा थरार बराच वेळ सुरू होता, मात्र काही अंतरावर पोलिसांची वाहने येताना दिसताच जेसीबी चालकाने घाबरून वाहन सोडून दिले आणि तिथून पळ काढला. महसूल विभागाच्या एका जबाबदार अधिकाऱ्याला अशा प्रकारे सार्वजनिक ठिकाणी जीवे मारण्याचा प्रयत्न होणे, ही अतिशय गंभीर बाब मानली जात आहे.
इतर महत्वाच्या बातम्या: डोंबिवली हादरलं! मित्राचा रुग्णालयात मृत्यू, आई-वडील बाहेरगावी असताना तरुणानं गळफास घेत संपवलं जीवन
कुही पोलिसांकडून तातडीने कारवाई; मुख्य आरोपी जेसीबी चालकास बेड्या
या धक्कादायक घटनेची माहिती मिळताच कुही पोलीस स्टेशनचे पथक तातडीने घटनास्थळी दाखल झाले आणि त्यांनी परिस्थिती हाताळली. नायब तहसीलदार बुद्धभूषण निकाळजे यांनी दिलेल्या तक्रारीवरून आणि प्रत्यक्षदर्शींच्या पुराव्यावरून पोलिसांनी गुन्हा दाखल केला आहे. पोलिसांनी या प्रकरणात वेगाने तपास चक्रे फिरवून बुधवारी मुख्य आरोपी आणि जेसीबी चालक मयूर थोटे याला अटक केली आहे. शासकीय कामात अडथळा निर्माण करणे आणि महसूल अधिकाऱ्याच्या जीविताला धोका निर्माण केल्याप्रकरणी त्याच्यावर विविध कलमान्वये कारवाई करण्यात येत आहे. या हल्ल्यात सामील असलेल्या इतर संशयितांचाही शोध पोलीस घेत असून मुरूम माफियांचे हे धाडस पाहून स्थानिक नागरिकांमध्ये भीतीचे वातावरण आहे.
प्रशासकीय अधिकाऱ्यांच्या सुरक्षिततेचा प्रश्न; मुरूम उपसा रोखण्यासाठी गेलेल्या पथकावर हल्ला
या अमानवी हल्ल्यानंतर कुही तालुक्याचे नायब तहसीलदार बुद्धभूषण निकाळजे यांनी आपल्या भावना व्यक्त करताना सांगितले की, अवैध कामांवर आळा घालण्यासाठी गेलेल्या पथकावर अशा प्रकारे हल्ला होणे हे दुर्दैवी आहे. बोरी नाईक परिसरातील या घटनेने अवैध उत्खनन करणाऱ्यांचे धाडस किती वाढले आहे, हे पुन्हा एकदा चव्हाट्यावर आले आहे. महसूल पथकाने रात्रीच्या वेळी धाड टाकली असली तरी माफियांनी संघटितपणे हा विरोध केला. सध्या पोलीस या प्रकरणाचा सखोल तपास करत असून अटकेत असलेल्या आरोपीची चौकशी सुरू आहे.
