महाराष्ट्रात पुन्हा लॉकडाऊन लागण्याची चिन्हं आहेत का?

मुंबई, पुणे, नागपूर, ठाणे, नाशिक, औरंगाबाद, नागपूर या प्रमुख शहरांमध्ये पॉझिटिव्ह रूग्ण झपाट्याने वाढत आहेत. ही बाब नक्कीच चिंता वाढवणारी आहे. गुरूवारी जी कोरोना रूग्णांची संख्या समोर आली त्यानुसार राज्यात ३५ हजारांपेक्षा जास्त पॉझिटिव्ह रूग्ण दिवसभरात आढळले आहेत. मागील काही दिवसांपासून ही संख्या सातत्याने २५ हजारांपेक्षा जास्त नोंदवली जाते आहे.

आरोग्यमंत्री राजेश टोपे काय म्हणाले होते?

राजेश टोपे यांनी २२ मार्चला लॉकडाऊनबद्दल महत्त्वाचं वक्तव्य केलं होतं. लॉकडाऊनच्या संदर्भात आम्ही मुख्यमंत्र्यांशी चर्चा केली. जर रूग्णसंख्या अशीच वाढत राहिली तर काही शहरांमध्ये लॉकडाऊन करावाच लागेल असं मुख्यमंत्र्यांचं म्हणणं आहे. तसंच गरज पडल्यास राज्यातही लॉकडाऊन करावं लागेल असंही मुख्यमंत्र्यांनी म्हटलं आहे.

त्याबद्दल त्यांच्याशी चर्चा करून निर्णय घेऊ असंही राजेश टोपे यांनी स्पष्ट केलं होतं. महाराष्ट्रातल्या जंबो सेंटर्सना कार्यरत राहण्याचे आदेश देण्यात आले आहेत. मुख्यमंत्र्यांसोबत झालेल्या व्हीडिओ कॉन्फरन्समध्ये काही गोष्टी स्पष्ट करण्यात आल्या असंही त्यांनी म्हटलं होतं.

Maharashtra Lock down : बीड, नांदेड, परभणीत पुन्हा कडक निर्बंध लागू

महाराष्ट्रात आत्तापर्यंत कोरोना झालेल्या रूग्णांची संख्या २५ लाखांच्या वर गेली आहेत. तर आज घडीला महाराष्ट्रातील अॅक्टिव्ह रूग्णांची संख्याही २ लाखांच्या पुढे गेली आहे.

लॉकडाऊन होऊ शकतो का? मुख्यमंत्र्यांनी काय म्हटलं होतं?

नंदुरबार दौऱ्यावर असतानाही मुख्यमंत्री उद्धव ठाकरे यांन लॉकडाऊनबाबत प्रश्न विचारण्यात आला होता. तेव्हा मुख्यमंत्री म्हणाले होते की राज्यात कोव्हिडचा धोका वाढतो आहे त्यामुळे लॉकडाऊन करणं हा मार्ग आहे. पण जनतेने सहकार्य करायला हवं. गेल्या वर्षी कोरोनाची साथ आली तेव्हा काहीही ठाऊक नव्हतं. आता लस आली आहे राज्यात लसीकरण वाढवण्याच्या दृष्टीनेही आम्ही प्रयत्न करतो आहोत.

पुण्यात लॉकडाऊन नाही पण कठोर निर्बंध; पाहा काय सुरु, काय बंद

वाशिममधल्या पाच गावांमध्ये, नागपुरात, औरंगाबादमध्ये लॉकडाऊन आहे. तसंच काही शहरांमध्ये निर्बंधही लादण्यात आले आहेत. पुणे, कल्याण डोंबिवली या शहरांमध्ये निर्बंध लादण्यात आले आहेत. गर्दी करू नका असंही आवाहन करण्यात येतं आहे.

पुण्यात लॉकडाऊन होणार का? महापौर मुरलीधर मोहोळ म्हणतात…

पहिल्या लॉकडाऊनमध्ये काहीही माहिती नव्हती, आजार काय आहे? काळजी काय घ्यायची? औषधं काय घ्यायची याबद्दल निश्चित अशी कोणतीही दिशा नव्हती. आता ती परिस्थिती नाही. कोरोनाला प्रतिबंध करणाऱ्या कोविशिल्ड आणि कोव्हॅक्सिन या दोन लसी देण्याची मोहीम सुरू करण्यात आली आहे.

जर पुन्हा लॉकडाऊन लागला तर तो आर्थिकदृष्ट्या परवडणारा नसेल. राज्याची आर्थिक घडी विस्कटली आहे हे अजित पवार यांनी बजेट सादर करतानाही सांगितलं होतं. कोरोना आणि लॉकडाऊन या दोन्ही गोष्टींमुळे देशाचं आणि राज्याचं आर्थिकदृष्ट्या कंबरडं मोडलं आहे. त्यातून कसंतरी सावरण्याचा प्रयत्न देश आणि राज्यांकडून होतो आहे अशात जर पुन्हा लॉकडाऊन लागला तर आर्थिक स्थिती आणखी कठीण होऊ शकते. आर्थिक आणीबाणीचा सामना हा पुन्हा करावा लागू शकतो.

Exclusive: मुंबईत तूर्तास लॉकडाऊन नाही: मुंबई महापालिका आयुक्त

गेल्या वर्षी कसे हाल झाले होते?

गेल्या वर्षी जेव्हा कोरोनाचा प्रादुर्भाव टाळण्यासाठी जेव्हा लॉकडाऊन देशभरात लावण्यात आला तेव्हा स्थलांतरित मजूर, गरीब माणसं, छोटे उद्योजक यांच्यासहीत अनेकजणांना त्याचा फटका बसला होता.

नोकरी करणाऱ्यांपैकी अनेकांच्या नोकऱ्या गेल्या तर अनेकांना पगार कपातीचाही फटका बसला. अनेक घटकांना मदत करण्यासाठी सरकारने पुढाकार घेतला होता. तसंच कोरोना न झालेल्या पण गंभीर आजार असलेल्या रूग्णांचेही उपचारांविना हाल झाले होते. हे सगळं टाळणं आपल्या हातात आहे.

काय आहेत उपाय?

• तुमचं वय ४५ वर्षे किंवा त्यापेक्षा अधिक आहे तर लसीकरणासाठी नोंदणी करा आणि लस घ्या

• सोशल डिस्टन्सिंग पाळा, अनावश्यक प्रवास टाळा

• हात धुवा, मास्क लावा, कोरोनाची कोणतीही लक्षणं दिसू लागल्यास त्वरित चाचणी करून घ्या

• कोरोना हा एक आजार आहे कोणत्याही प्रकारचा कलंक नाही त्यामुळे त्याबद्दल भीती किंवा घृणा बाळगू नका

• हाऊसिंग सोसायटीत वास्तव्य करत असाल तर कोरोना झाल्याची माहिती सोसायटी मेंबर्सपासून लपवू नका

• ज्या ठिकाणी काम करण्यासाठी जात आहात तिथेही सोशल डिस्टन्सिंग पाळा, मास्कचा वापर करणं सोडू नका

स्वतःची काळजी घ्या, कुटुंबाची काळजी घ्या. छोट्या छोट्या उपाय योजना आणि सावधगिरी बाळगण्यात आपण खबरदारी घेतली तर कोरोना नक्कीच बरा होऊ शकतो किंवा तो होण्यापासून आपण वाचू शकतो. लॉकडाऊनचा निर्णय घ्यायचा की नाही त्याचा अंतिम निर्णय सरकारच घेईल. मात्र तो लागू नये यासाठी प्रयत्न करणं एवढीच बाब आपल्या हातात आहे कारण दुसरा लॉकडाऊन कोणत्याही परिस्थिती परवडणारा नाही.