काँग्रेसचा दारुण पराभव तर भाजपला फायदा : देशभरातील पोटनिवडणुकांचा निकाल

महाराष्ट्राशिवाय देशभरातील विविध राज्यांमध्येही आज पोटनिवडणुकीचा निकाल जाहीर झाला. यात काँग्रेसला दारुण पराभव स्वीकारावा लागला आहे. ज्या जागा यापूर्वी काँग्रेसकडे होत्या, त्या राखण्यात देखील काँग्रेसला अपयश आलं आहे. तर भाजपचा एका जागेचा आणि के. चंद्रशेखर राव यांच्या तेलंगणा राष्ट्र समितीलाही एका जागेचा फायदा झाला आहे.

देशभरातील विविध पोटनिवडणुकांचा निकाल :

• बिहार :

बिहारमध्ये विधानसभेच्या २ जागांसाठी पोटनिवडणूक जाहीर झाली होती. यातील एका जागेवर भाजप आणि एकावर राष्ट्रीय जनता दलाचा उमेदवार विजयी झाला आहे. गोपाळगंज विधानसभा पोटनिवडणुकीत भाजप आणि राजदमध्ये कांटे की टक्कर पाहायला मिळाली. पण अखेरच्या दोन फेऱ्यांमध्ये भाजप उमेदवार कुसुम देवी यांनी आघाडी घेऊन राजदच्या मोहन प्रसाद गुप्ता यांचा अवघ्या १७९३ मतांनी पराभव केला.

बिहारमधील मोकामा विधानसभा पोटनिवडणुकीत राजदने बाजी मारली आहे. राजच्या नीलम देवी यांनी भाजपच्या उमेदवार सोनम देवी यांचा १६ हजार मतांनी पराभव केला. नीलम देवी यांना ७९ हजार ७४४ मतं मिळली तर सोनम देवी यांना ६३ हजार ००३ मिळाली.

• हरयाणा

हरयाणाच्या आदमपुर विधानसभा पोटनिवडणुकीत भाजप उमेदवार भव्य बिश्नोई यांनी विजय संपादन केला. त्यांनी काँग्रेसच्या जय प्रकाश यांना जवळपास १६ हजारांच्या मतांनी धूळ चारली. भव्य बिश्नोई यांनी ६७ हजार ३७६ मतं मिळाली तर जय प्रकाश यांना ५१ हजार ६६२ मतं मिळाली. यापूर्वी ही जागा काँग्रेसच्या खात्यात होती.

• तेलंगाणा

तेलंगाणाच्या मुनूगोडे मतदारसंघाच्या पोटनिवडणुकीत भाजप आणि तेलंगणा राष्ट्र समिती पक्षात कडवी झुंज झाली. अखेरीस या लढतीत तेलंगणा राष्ट्र समितीच्या के. प्रभाकर रेड्डी यांनी १० हजार मतांनी भाजपचे उमेदवार के. राजगोपाल रेड्डी यांचा पराभव केला. तेलंगणामध्ये भाजपने अलिकडील काळात जोरदार ताकद लावली आहे. ही जागा देखील यापूर्वी काँग्रेसकडे होती.

• उत्तर प्रदेश

याशिवाय उत्तर प्रदेशच्या गोकर्णनाथ मतदारसंघातील पोटनिवडणुकीत भाजपने जागा राखली आहे.

• ओडिसा

तसंच ओडिसामधील धामनगर मतदारसंघातही भाजपने विजय मिळवत ही जागा कायम राखण्यात यश मिळवलं आहे. भाजपेच उमेदवार सूर्यबंशी सूरज यांनी इथून विजय संपादन केला.