नागपूर ग्रामीणच्या जिल्हाप्रमुखाची शिवसेनेतून हकालपट्टी; पक्ष विरोधी कारवाईचा ठपका

नागपूर: एकनाथ शिंदेंनी (Eknath Shinde) शिवसेनेतून ४० आमदारांना आपल्या सोबत घेत बंड केले. त्यानंतर राज्यात राजकीय खळबळ माजली. त्यानंतर भारतीय जनता पार्टी आणि एकनाथ शिंदे गट यांनी मिळून सरकार स्थापन केले. एकनाथ शिंदेंनी शिवसेनेविरोधात बंड केल्यानंतर अनेक मुळ शिवसेना सोडून एकनाथ शिंदे गटात सामील होत आहेत.

ठाणे, नवी मुंबई तसेच महाराष्ट्रातून अनेक शिवसैनिक, माजी नगरसेवक, माजी आमदार, खासदार शिंदे गटात सामील होत आहेत. त्यामुळे पक्षप्रमुख उद्धव ठाकरे (Uddhav Thackeray) त्यांच्यावर कठोर पावलं उचलत त्यांची पक्षातून हकालपट्टी करत आहेत. असाच प्रकार घडलाय नागपूर ग्रामीणच्या जिल्हाध्यक्षांच्या बाबतीत.

संदीप इटकेलवार यांची शिवसेनेतून (Shivsena) हकालपट्टी करण्यात आली आहे. इटकेलवार नागपूर ग्रामीणचे जिल्हाप्रमुख होते. शिंदे गटात सामील झाल्यामुळे तसेच पक्ष विरोधी कारवाईचा ठपका ठेवत संदीप इटकेलवार यांची शिवसेनेतून हकालपट्टी करण्यात आली असल्याचे सांगण्यात आले आहे. संदीप इटकेलवार यांची काही महिन्यांपूर्वी नागपूर सुधार प्रन्यास (NIT) वर विश्वस्त म्हणून महाविकास आघाडी सरकारद्वारा (Mahavikas Aaghadi) नियुक्ती करण्यात आली होती.