पुण्यातील Marathe Jewellers च्या प्रणव मराठेंना 5 कोटींच्या फसवणूक प्रकरणी अटक

प्रणव मराठे यांनी 18 गुंतवणूकदारांची पाच कोटींहून जास्त रकमेची फसवणूक केल्याचा आरोप त्यांच्यावर आहे. अटक केल्यानंतर प्रणव मराठेंना न्यायालयात हजर केलं असता त्यांना 18 ऑगस्टपर्यंत पोलीस कोठडी सुनावण्यात आली आहे. शुभांगी काटे यांनी केलेल्या तक्रारीनंतर प्रणव मराठे यांच्यावर कारवाई करण्यात आली आहे.

पोलिसांनी दिलेल्या माहितीनुसार, मराठे ज्वेलर्समार्फत सोने, चांदी आणि मूळ रकमेवर जादा परतावा मिळेल असं आमीष नागरिकांना दाखवण्यात आलं होतं. यामुळे अनेक नागरिकांनी त्यांच्याकडे पैसे गुंतवले. पण बरेच दिवस होऊनही पैसे किंवा परतावा मिळाला नाही. शुभांगी काटे यांनी याबाबत ज्वेलर्सकडे विचारणा केली, मात्र ज्वेलर्सकडून काही माहिती मिळाली नाही. त्यानंतर काटे यांनी तक्रार दाखल केली. त्यानंतर प्रणव मराठे यांच्यावर गुन्हा दाखल करण्यात आला.

तपास करण्यात आला असता 18 गुंतवणूकदारांची तब्बल 5 कोटी 9 लाख 72 हजार 970 रूपयांची फसवणूक झाल्याचे स्पष्ट झालं आहे. या सर्व गुंतवणुकदारांचे पैसे प्रणव यांनी स्वतः फायद्यासाठी वापरल्याचं निष्पन्न झालं असून त्या आधारे प्रणव मराठेंना अटक केली आहे. त्यानंतर न्यायालयात हजर केलं असता 18 ऑगस्टपर्यंत पोलीस कोठडी सुनावण्यात आली.