चिखलदऱ्यात लवकरच सुरु होणार २ हजार गणेश मुर्तींचे संग्रहालय

या उपक्रमाबद्दल माहिती देताना नंद म्हणाले, “लहानपणापासून मला गणेश मूर्ती बनवण्याचा छंद होता. कालांतराने या व्यवसायात शिरल्यानंतर गणेश मूर्ती बनवण्यापासूनच विविध ठिकाणच्या, विविध आकाराच्या गणेश मूर्ती जमवण्याचा छंद मला जडला. आतापर्यंत मी विविध आकाराच्या २ हजार गणेश मूर्ती जमवल्या आहेत. १ इंचापासून ते ५ फुटापर्यंत सर्व मुर्त्यांचा यात समावेश आहे. काच, माती, दगड, लाकूड, धातू, फायबर अशा विविध माध्यमात बनवलेल्या मूर्तींचा यात समावेश आहे.”

चिखलदऱ्यात प्रवेश करताना डाव्या हाताला असेलल्या २ एकराच्या प्रशस्त जागेवर हे संग्रहालय उभारण्याचा नंद यांचा मानस आहे. या कामाला आता सुरुवातही झाली असून येत्या गणेशोत्सवात हे संग्रहालय सुरु करण्याचा नंद यांचा विचार आहे. गणपती हे लहान मुलांचं आवडतं दैवत मानलं जातं. त्यामुळे लहान मुलांचा विचार करुन नंद यांनी या जागेत विविध वाद्य वाजवणारा, गाडी चालवणारा, खेळाडूंच्या रुपातला छोटेखानी गणपती पार्क तयार करणार आहेत.

या माध्यमातून राज्यभरातून विविध पर्यटक चिखलदऱ्यात भेट द्यायला येतील असा नंद यांना विश्वास आहे. याचवेळी नंद यांनी महाराष्ट्रात ज्या कोणाकडे गणपतीच्या विविध आकाराच्या मूर्ती घरात असतील आणि त्याचं जतन करणं शक्य नसेल अशा मूर्ती संग्रहालयाला दान करण्याचं आवाहन केलं आहे.