नितीन वैद्य यांना ना. य. डोळे स्मृती पुरस्कार

कोण आहेत नितीन वैद्य?

नितीन वैद्य हे आज मराठी टेलिव्हिजन इंडस्ट्रीतील मोठे प्रस्थ म्हणून ओळखले जातात. आपल्या ठायी उद्यमशीलता, दूरदृष्टी, कृतिशीलता आणि व्यावसायिकता ह्या मूल्यांना रुजवत आपला लौकिक प्रवास करत असताना त्यांनी सामाजिक भान आणि संवेदनशीलता सुद्धा कसोशीने जपली आहे हे विशेष. त्यांची पत्रकारितेतील कारकीर्द ही दैदीप्यमान राहिली आहे.

नितीन वैद्य : पत्रकार म्हणून विविध दैनिकांमध्ये काम

वैद्य यांनी 1985 या वर्षी दैनिक सकाळमधून वार्ताहर म्हणून सुरुवात केली. 1988 साली ते महाराष्ट्र टाइम्समध्ये दाखल झाले. राजकीय, सामाजिक, शैक्षणिक बातमीदारी यात त्यांचा हातखंडा होता. गोविंद तळवळकर व कुमार केतकर यांच्या मार्गदर्शनात त्यांच्या कारकिर्दीला बहर आला. 1991 या वर्षी ‘मटा’ने त्यांची दिल्ली येथे विशेष प्रतिनिधी म्हणून नेमणूक केली. काश्मिर समस्या, नवीन आर्थिक धोरण, देशभरातील विविध निवडणुका, मंडल आयोगाचा लढा, लालकृष्ण अडवाणी यांच्या रथयात्रेनंतर बदलत असलेले देशाचे राजकारण, राजकीय आघाड्यांचे प्रयोग आदी विषयांवरील वैद्य यांची राष्ट्रीय पत्रकारिता गाजली.