Sameer Wankhede: ‘मलिकांनी एकदा लोखंडवाला मार्केटमध्ये जावं आणि..’, समीर वानखेडे असं का म्हणाले?

समीर वानखेडे प्रचंड महागडे कपडे वापरतात या मलिकांच्या आरोपाला उत्तर देताना वानखेडे असं म्हणाले की, त्यांनी एकदा लोखंडवाला मार्केटमध्ये जावं आणि तिथे जाऊन कपड्यांचे दर समजून घ्यावेत. यावेळी वानखेडे असंही म्हणाले की, एका ड्रग पेडलरच्या माध्यमातून त्यांच्या कुटुंबीयांना अडकविण्याचा प्रयत्न देखील केला गेला होता.

‘ड्रग पेडलरच्या मदतीने कुटुंबीयांना अडकविण्याचा प्रयत्न’

समीर वानखेडे म्हणाले, ‘सलमान नावाच्या एका ड्रग्स पेडलरने त्यांच्या बहिणीशी संपर्क साधला होता. परंतु माझी बहिण NDPS च्या केस हाताळत नाही. त्यामुळे तिने त्याची केस घेतली नाही. माझ्या बहिणीने केस घेण्यबाबत त्याला नकार दिला. सलमान नावाच्या या पेडलरने एका मध्यस्थाच्या माध्यमातून आम्हाला अडकवण्याचा प्रयत्न केल्याचा दावा त्याने केला आहे. या वर्षाच्या सुरुवातीला त्याने मुंबई पोलिसांकडे खोटी तक्रारही केली होती, मात्र काहीही निष्पन्न झाले नाही.’

‘सलमानसारख्या अनेक पेडलर्सच्या माध्यमातून माझ्या बहिणीला, कुटुंबाला अडकवण्याचा प्रयत्न करण्यात आला आहे. यापूर्वीही असे प्रयत्न आणि कारस्थान सुरू आहे. या सगळ्यामागे ड्रग्ज माफियाचा हात आहे.’ असंही वानखेडे यांनी म्हटलं आहे.

महागडे कपडे परिधान केल्याच्या आरोपावर वानखेडे काय म्हणाले?

वानखेडे यांनी घातलेल्या शर्टची किंमत 70 हजारांपेक्षा जास्त असल्याचा आरोप राष्ट्रवादीचे नेते नवाब मलिक यांनी केला. ते वापरत असलेल्या पँटची किंमत लाखांमध्ये आहे. तर ते प्रत्येकी 2 लाख रुपये किमतीचे बूट वापरतात असे आरोप मलिकांकडून करण्यात आले. या आरोपांवर उत्तर देताना वानखेडे म्हणाले की, ‘आपण लोखंडवाला मार्केटमध्ये जाऊन कपड्यांचे दर जाणून घेऊ शकता. त्यांनी फार कमी माहिती मिळवली आहे. त्यांना अधिक माहिती मिळवण्याची गरज आहे.’

नवाब मलिकांविरोधात खटला दाखल होणार का?

मंत्री नवाब मलिक हे गेल्या अनेक दिवसांपासून समीर वानखेडेंबाबत आक्रमकपणे आरोप करत आहेत. मलिक यांनी आतापर्यंत अनेक वेगवेगळे आरोप समीर वानखेडेंवर केले आहेत. वानखेडे हे दलित नसून मुस्लिम आहेत. पण त्यांनी खोटे जात प्रमाणपत्र बनवून नोकरी मिळवली. असा खळबळजनक आरोप मलिकांनी केला आहे.

या आरोपांबाबत वानखेडे यांनी सोमवारीच एससी-एसटी आयोगाचे अध्यक्ष विजय साम्पला यांची भेट घेऊन त्यांची सर्व कागदपत्रे आयोगाला सादर केली. तसेच त्यांनी अ‍ॅट्रॉसिटी कायद्यान्वये गुन्हा दाखल करण्याची मागणी आयोगाकडे केली असल्याचे वानखेडे यांनी आज सांगितले. याप्रकरणी लवकरच गुन्हा दाखल करणार असल्याचे सांगण्यात आलं आहे.

नवाब मलिकांनी नेमके काय आरोप केले?

‘समीर वानखेडे 70 हजार रुपये किंमतीची शर्ट वापरतात’

‘ज्ञानेश्वर सिंग आणि इतर अधिकारी हे टीव्हीवर येतात. पण कोणत्याही अधिकाऱ्याचा शर्ट हा 1000-500 रुपयांपेक्षा महाग नाही. पण समीर वानखेडेंचा शर्ट हा 70 हजार रुपये किंमतीचा का असतो? दररोज नवे कपडे परिधान करुन येतात हे तर मोदी साहेबांच्या देखील पुढे निघून गेले आहेत.’

‘त्यांची पँट लाख रुपयांची, पट्टा दोन लाख रुपयांचा, शूज अडीच लाख रुपयांचे. घड्याळ 50-25 लाखांचे… या सगळ्या दिवसात त्यांनी जे कपडे परिधान केलेले आहेत त्याची एकूण किंमतच 5-10 कोटींची आहे.’ असा दावा मलिकांनी केला आहे.

Nawab Malik: 70 हजाराचा शर्ट, 2 लाखांचे बूट.. सगळं आलं कुठून?, मलिकांचे समीर वानखेडेंवर नवे गंभीर आरोप

‘इमानदार अधिकारी 10 कोटींचे कपडे परिधान करु शकतो?’

‘इमानदार अधिकारी काय 10 कोटींचे कपडे परिधान करु शकतो? कोणताही शर्ट त्यांनी पुन्हा परिधान केला आहे हे आम्हाला पाहायला मिळालं नाही. यापेक्षा इमानदार कोणीही असू शकत नाही जो दोन लाख रुपये किंमतीचे शूज दररोज परिधान करेल.’

‘मी आजही माझ्या बोलण्यावर ठाम आहे. समीर वानखेडेने हजारो-कोटींची वसुली केली आहे. घोटाळे केले आहेत. याची चौकशी झाली पाहिजे. वसुली सुरुच आहे. असं म्हटलं जात आहे की, नवाब मलिक हे प्रश्न विचारत आहेत. त्यांना बोलण्यापासून रोखलं जावं.’

वानखेडेवर आरोप करताना मलिक म्हणाले, ‘लुई वेटॉनच्या बूटाची किंमत प्रत्येकी दोन लाख रुपये आहे. असे शूज ते कायम बदलत राहतात. बरबरीच्या शर्ट जर आपण पाहिला तर त्याची किंमत 50 हजार रुपयांपासून पुढे सुरू होते तर टी-शर्टची किंमत 30,000 रुपयांपासून सुरू होते.’