महाविकास आघाडीतून राजू शेट्टी बाहेर पडणार? रविवारी मोठी घोषणा?

पंढरपूर मंगळवेढा विधानसभा पोट निवडणुकीसाठी अर्ज मागे घेण्याच्या शेवटच्या दिवशीही माजी खासदार राजू शेट्टी यांच्या स्वाभिमानी शेतकरी संघटनेचे उमेदवार सचिन पाटील यांनी उमेदवारी अर्ज कायम ठेवला आहे. ही बंडखोरी शमवण्यात राष्ट्रवादी काँग्रेसचे प्रदेशाध्यक्ष जयंत पाटील यांची शिष्टाई यशस्वी ठरू शकलेली नाही. राजू शेट्टी यांच्याशी आमचा संपर्क आहे, त्यांच्या काही तक्रारी आहेत. भविष्यात त्यांचे समाधान करण्याविषयी आमची चर्चा झाली आहे असं जयंत पाटील यांनी म्हटलं आहे. राजू शेट्टी यांनीही उमेदवाराशी संपर्क साधला मात्र काही अडचणींमुळे त्यांचा अर्ज निघाला नाही असंही उत्तर जयंत पाटील यांनी दिलं आहे. मात्र राजू शेट्टी हे लवकरच महाविकास आघाडीतून बाहेर पडतील अशी शक्यता वर्तवली जाते आहे. एवढंच नाही तर रविवारीच यासंदर्भातली घोषणा केली जाईल अशीही माहिती समोर येते आहे.