Vijay Shivtare : “संजय राऊत स्क्रिझोफ्रेनिया झालेल्या रूग्णासारखं वागत आहेत”

काय म्हणाले आहेत विजय शिवतारे?

“संजय राऊत यांची निष्ठा शिवसेनेसोबत किती आहे आणि शरद पवारांसोबत किती आहे हे सगळ्यांना माहित आहे. जे महाराष्ट्राला कळतंय, आमदारांना कळतंय ते उद्धव ठाकरे यांना कळत नाही? संजय राऊत यांना आपल्यालाच सगळं समजतं आहे असा भास होतो आहे. दुभंगलेलं व्यक्तिमत्व असा एक प्रकार असतो ज्याला स्क्रिझोफ्रेनिया झालेला रूग्ण म्हणतात. संजय राऊत यांची अवस्था त्या रूग्णासारखीच आहे.” असाही टोला विजय शिवतारे यांनी लगावला.

शिवसेनेत एवढी मोठी फूट पडली आहे तरीही उद्धव ठाकरेंनी कार्यकर्त्यांना काँग्रेस आणि राष्ट्रवादीसोबत जुळवून घ्यायला सांगितलं आहे. हे काय आहे? भानामती आहे, गारूड आहे की हिप्नॉटिझम? असा प्रश्न सामान्य माणसाला पडला आहे. टीव्ही ९ मराठीसोबत संवाद साधत असताना विजय शिवतारे यांनी ही टीका केली आहे.

शिवसेनेत २१ जूनला बंड झालं. त्यानंतर एकनाथ शिंदे आणि त्यांच्यासह शिवसेनेचे ४० आमदार गेले. तसंच इतर ११ अपक्षांचं बळही त्यांना लाभलं. त्यानंतर एकनाथ शिंदे यांनी भाजपसोबत जात सरकार स्थापन केलं. तसंच एकनाथ शिंदे हे मुख्यमंत्री आणि देवेंद्र फडणवीस हे उपमुख्यमंत्री झाले. या सगळ्यानंतर या दोघांवर तसंच भाजपवर बरीच टीका झाली. मात्र शिवसेनेत आरोप प्रत्यारोप होताना दिसत आहेत.