Sheena Bora Murder Case : मुख्य आरोपी इंद्राणी मुखर्जीला सर्वोच्च न्यायालयाकडून जामीन मंजूर

या खटल्याची सुनावणी इतक्यात संपणार नसून इंद्राणी साडेसहा वर्ष तुरुंगात असल्यामुळे तिचा जामीन न्यायालयाने मंजूर केला आहे.

मुंबई हायकोर्टाने २०२१ मध्ये इंद्राणी मुखर्जीचा जामीन अर्ज फेटाळला होता, ज्यानंतर तिने सर्वोच्च न्यायालयात धाव घेतली होती. हा खटला परिस्थितीजन्य पुराव्याच्या आधारावर सुरु आहे. सरकारी पक्षाने दिलेल्या साक्षीदारांपैकी ५० टक्के साक्षीदारही सोडून दिले तरीही हा खटला इतक्यात संपणार नसल्याचं मत नोंदवत कोर्टाने इंद्राणीचा जामीन मंजूर केला. ज्येष्ठ वकील मुकुल रोहतगी यांनी इंद्राणी मुखर्जीची बाजू कोर्टात मांडली.

सीबीआयची बाजू मांडणारे Additional Solicitor General एस.व्ही. राजू यांनी इंद्राणीच्या जामीन अर्जाला विरोध दर्शवला. परंतू या खटल्यातील सह आरोपी पीटर मुखर्जीलाही जामीन मंजूर करण्यात आल्याचं कोर्टाच्या लक्षात आणून दिल्यानंतर इंद्राणीचा जामीन अर्ज मंजूर करण्यात आला.