Taliban-Afghanistan War : अफगाणिस्तानात होणार सत्तांतर?, काबूलला वेढा पडताच घडामोडींना वेग

शनिवारपर्यंत (१४ ऑगस्ट) राजधानी काबूलच्या सीमेपर्यंत पोहोचलेल्या तालिबानी बंडखोरांनी काबूलला चोहीबाजूंनी वेढा दिला आहे. आता काबूल शहरातही तालिबानी बंडखोर घुसले असून, ताकदीच्या बळावर काबूलवर कब्जा करणार नसल्याचं तालिबाननं म्हटलं आहे.

तालिबानी बंडखोर काबूलमध्ये शिरल्याचं वृत्त एपी या वृत्तसंस्थेनं अफगाणिस्तानी उच्च अधिकाऱ्यांच्या हवाल्यानं दिलं आहे. तालिबानी बंडखोर काबूलमधील कलाकान, काराबाग आणि पगमान जिल्ह्यात पोहोचले आहेत. त्यामुळे अफगाण सरकारची चिंता वाढली आहे. बंडखोर काबूलमध्ये घुसल्याचं वृत्त समोर आल्यानंतर तालिबानकडून निवेदन प्रसिद्ध करण्यात आलं आहे.

‘ताकदीच्या जोरावरआपण काबूलवर कब्जा मिळवण्याचा आपला विचार नाही. सर्व काही सत्तांतरातून सूत्रे हस्तांतरित केली जावीत. सत्तांतर शांततेत झाल्यास कोणतीही जीवित वा आर्थिक हानी केली जाणार नाही’, असं तालिबाननं म्हटलं आहे.