एकनाथ शिंदेसोंबत का गेलो? बाळासाहेबांचे विश्वासू सेवक थापा यांनी सांगितलं कारण, म्हणाले…

एकनाथ शिंदे यांच्यासोबत जाण्याचा निर्णय का घेतला? थापा यांनी सांगितलं कारण

मला बाळासाहेब ठाकरे यांचे विचार पटतात. तसंच एकनाथ शिंदे यांचेही विचार पटतात. आपल्या मनाने जो कौल दिला तो मी मान्य केला आणि मी शिंदे गटात आलो असं सांगत एकनाथ शिंदे यांच्यासोबत आपण का आलो हे थापा यांनी स्पष्ट केलं आहे.

मुख्यमंत्री एकनाथ शिंदे यांनी काय म्हटलं आहे?

बाळासाहेबांसोबत कोण राहतो? असे जर कुणी विचारले, तर लगेच नाव यायचं ते चंपासिंह थापा यांचं. ते बाळासाहेबांसोबत सावलीसारखे राहिले. आता थापा हे सुद्धा देवीच्या उत्सवात सामील झाले असून त्यांनी शिवसेनाप्रमुख बाळासाहेब ठाकरे यांचे विचार आणि हिंदुत्वाचे विचार पुढे नेत असल्याचे सांगितले. जी चूक २०१९ ला व्हायला नको होती, ती तुम्ही दुरुस्त करत आहात. बाळासाहेब ठाकरेंचे विचार जो कोणी पुढे नेईल. त्याच्याबरोबर सदैव राहील, असे सांगत त्यांनी बाळासाहेबांच्या आणि हिंदुत्वाच्या विचारांच्या आपल्या शिवसेनेला पाठींबा दिला आहे.

हिंदुहृदयसम्राट शिवसेनाप्रमुख बाळासाहेब ठाकरे यांची सावली समजले जाणारे चंपासिंह थापा व मातोश्रीवर प्रदीर्घ काळ सेवा बजावलेले मोरेश्वर राजे यांनी आज टेंभीनाका येथील जय अंबे धर्मादाय विश्वस्त संस्थेच्या दुर्गेश्वरी मातेच्या आगमन मिरवणुकीत आम्हाला पाठींबा देण्याचा निर्णय जाहीर केला. pic.twitter.com/UT82ppZlMV

— Eknath Shinde – एकनाथ शिंदे (@mieknathshinde) September 26, 2022

कोण आहेत चंपासिंह थापा?

चंपासिंह थापा हे बाळासाहेब ठाकरेंसोबत सावलीसारखे असायचे. दसरा मेळावा असेल किंवा जाहीर सभा असेल तेव्हा बाळासाहेब ठाकरेंच्या आसनामागे थापा विनम्रपणे उभे असायचे. अनेकदा त्यांचेही फोटो समोर आले आहेत. बाळासाहेब ठाकरेंना पाणी देणं, नॅपकिन देणं, चालताना हात धरून आधार देणं या सगळ्या जबाबदाऱ्या थापा चोखपणे पार पाडत. बाळासाहेब ठाकरे यांना थापा यांनी कायमच सावलीसारखी सोबत केली होती. बाळासाहेब ठाकरे यांचा मृत्यू झाल्यानंतर त्यांच्या अंत्ययात्रेतही बाळासाहेब ठाकरे यांच्या पार्थिवाजवळ थापा होते. आज याच थापांनी एकनाथ शिंदेंच्या शिंदे गटात प्रवेश केला आहे. उद्धव ठाकरेंसाठी हा धक्का मानला जातो आहे.