ठाकरे सरकारने नीट ऐकलं नाही, पेट्रोल-डिझेलऐवजी दारू स्वस्त केली; अमित शाह यांचा टोला

देशाचे गृहमंत्री अमित शाह हे आज पुणे दौऱ्यावर आहेत. या दौऱ्यात त्यांनी पुणे महापालिकेच्या विस्तारित इमारतीतल्या डॉ. बाबासाहेब आंबेडकर यांच्या पुतळ्याचे अनावरण केलं. त्यानंतर पुण्यात बोलत असताना महाविकास आघाडी सरकारने पेट्रोल डिझेल नाही तर दारू स्वस्त केली असा टोला लगावला.

स्वराज्य हा माझा जन्मसिद्ध हक्क आहे असं लोकमान्य टिळक म्हणत असत. मात्र शिवसेना म्हणते सत्ता मिळवणं हा आमचा जन्मसिद्ध आहे, त्यासाठी आम्ही काहीही करायला तयार आहोत. आज आव्हान देतो. राजीनामा द्या, तिन्ही पक्ष एकत्र लढा भाजपचा कार्यकर्ता तयार आहे. सिद्धांत सोडून केलेलं राजकारण कुणालाच आवडत नाही. महाविकास आघाडीच्या अंताची सुरूवात पुण्यापासून करा असंही आवाहन अमित शाह यांनी केलं आहे.