(Ajit Pawar Friendship With Laxman Jagtap)
भाजपचे आमदार लक्ष्मण जगताप यांचं मंगळवारी निधन झालं. मागील अनेक दिवसांपासून ते दुर्धर आजाराने त्रस्त होते. पण अखेर आज त्यांची प्राणज्योत मालवली. पुणे, पिंपरी-चिंचवडच्या राजकारणात सर्वपक्षीय मैत्र असलेला नेता म्हणून जगताप यांना ओळखलं जातं होतं. त्यातही राष्ट्रवादीचे नेते अजित पवार यांच्याशी असलेलं त्यांचं सख्य पुणे आणि पिंपरी चिंचवडकरांनी अतिशय जवळून पाहिलं आहे.
अजित पवार आणि लक्ष्मण जगताप यांच्या मैत्रीचे किस्सेही अनेकदा सांगितले जातात. असाच किस्सा म्हणजे राजकारणाच्या पलिकडे जाऊन अजित पवार यांनी जगताप यांच्याशी मैत्र जपलेलं आणि त्यामुळेच ते दोनवेळा आमदार होऊ शकले होते.
लक्ष्मण जगताप यांच्या राजकीय कारकीर्दीची सुरुवात काँग्रेसमधून झाली होती. १९८६ ते २००६ अशी सलग २० वर्षे पिंपरी-चिंचवड महापालिकेत ते नगरसेवक होते. १९९३ ला ते स्थायी समिती अध्यक्ष, तर २००० ला महापौर झाले. या दरम्यानच्या काळात १९९९ साली त्यांनी राष्ट्रवादीमध्ये प्रवेश केला. आज त्यांच्यामुळेच पिंपरी-चिंडवड शहरात राष्ट्रवादीची मोठी ताकद उभी राहु शकली, हे सत्य कोणीही नाकरणार नाही.
महापौरपदापर्यंत मजल मारलेल्या जगताप यांना पुढचं क्षितीज खुणावत होतं ते म्हणजे आमदार होण्याचं. लक्ष्मण जगताप यांनी २००४ च्या विधानसभा निवडणुकीत उतरायचं ठरवलं. त्यासाठी त्यांनी हवेली मतदारसंघाची निवड केली. पण हवेलीमधून विलास लांडे यांनी राष्ट्रवादीचं तिकिट मिळविण्यात आधीच बाजी मारली होती. त्यामुळे पक्षाचं अधिकृत तिकिट जगताप यांना मिळणार नव्हतं.
अशावेळी जगताप यांनी पक्षाविरोधात बंडखोरी करुन अपक्ष फॉर्म भरण्याचा निर्णय घेतला. ही गोष्ट पवारांना कळली तेव्हा "मी तुला आमदार करतो", असा शब्द देऊन त्यांनी जगताप यांना बंडखोरीपासून परावृत्त केलं. जगताप यांनीही माघार घेत पक्षाचं काम केलं. विलास लांडे १७ हजार मतांनी हवेलीचे पहिले आमदार झाले. त्यानंतर जगताप यांनी विधान परिषदेच्या पुणे स्थानिक स्वराज संस्था मतदारसंघातून तयारी सुरु केली.
पुणे स्थानिक स्वराज्य संस्था मतदारसंघाची जागा त्यावेळी काँग्रेसकडे होती. काँग्रेसनं इथून सासडवचे माजी नगराध्यक्ष चंदुकाका जगताप यांना उमेदवारी दिली. काँग्रेस आणि राष्ट्रवादी काँग्रेसची आघाडी असल्यानं आघाडी धर्म म्हणून काँग्रेसला मदत करणं आवश्यक होतं. मात्र अजित पवार यांनी ताकद लक्ष्मण जगताप यांच्या मागे उभी केली. निकालानंतर लक्ष्मण जगताप यांना ३५० आणि चंदुकाका जगताप यांना अवघी १५८ मत मिळाली होती.
अजित पवारांनी शब्द खरा केला. लक्ष्मण जगताप पहिल्यांदा आमदार झाले. त्यावेळी बोलताना जगताप यांनीही आपण हा विजय अजितदादांना समर्पित करतं असल्याचं सांगितलं होतं. तसंच आपल्यामुळे अजित पवार आणि शरद पवार यांच्या विश्वासार्हतेला काँग्रेसच्या मनात धक्का लागला असं म्हणतं त्यांनी खेद व्यक्त केला होता.
पुढे २००९ साली समीकरण बदलली. चिंचवड विधानसभा मतदारसंघ अस्तित्वात आला. पण तो काँग्रेसला सोडण्यात आला. मात्र, राष्ट्रवादी आणि अजित पवार यांच्या मदतीने लक्ष्मण जगताप यांनी राष्ट्रवादीच्या सर्व नगरसेवकांची सर्व ताकद वापरून काँग्रेस-राष्ट्रवादी आघाडीचे उमेदवार भाऊसाहेब भोईर यांचा दारूण पराभव केला. जगताप यांनी पुन्हा एकदा बाजी मारली. भोईर यांना त्यावेळी २५ हजार मतही मिळाली नव्हती.
अलिकडे उपमुख्यमंत्री असताना अजित पवार यांच्या हस्ते पिंपरी-चिंचवड महानगरपालिकेच्या विविध विकास कामांचे उद्घाटन, भूमिपूजन होणार होतं. पण, लक्ष्मण जगताप यांना रुग्णालयात दाखल करण्यात आल्याची माहिती मिळताच त्यांनी पिंपरी-चिंचवडमधील उद्घाटन कार्यक्रम रद्द करून थेट रुग्णालय गाठलं. आमदार जगताप यांच्या प्रकृतीची विचारपूस केली. त्यांच्या कुटुंबीयांशी संवाद साधला.
याचवेळी आमदार जगताप यांना तातडीनं एका इंजेक्शनची गरज असून, त्यासाठी राज्य व केंद्र शासनाकडून तातडीने परवानगी घ्यावी लागणार असल्याचं अजित पवार यांना समजलं. त्यानंतर त्यांनी सूत्र हालवून राज्याचे तत्कालिन आरोग्यमंत्री राजेश टोपे आणि खासदार सुप्रिया सुळे यांना संबंधित इंजेक्शन मिळवून देण्यासाठी राज्य आणि केंद्र सरकारकडून आवश्यक परवानगी घेण्याची विनंती केली.
राज्य सरकारकडून सर्व सोपस्कार पूर्ण झाल्यानंतर केंद्रीय मंत्री नितीन गडकरी आणि डॉ. भारती पवार यांच्याशी संपर्क करण्यात आला. त्यांच्या मदतीने अमेरिकेतून संबंधित इंजेक्शन भारतात आणण्याचा मार्ग मोकळा झाला. इंजेक्शनच्या एका डोसनेच आमदार जगताप यांच्या प्रकृतीत सुधारणा झाल्याचं त्यांचे बंधू शंकर जगताप यांनी सांगितलं होतं.
