‘103 दिवस तुरुंगात राहिले, त्यांनी मोदींवर बोलावं?’ चित्रा वाघ राऊतांवर एवढ्या का संतापल्या?
संजय राऊत यांनी पंतप्रधान नरेंद्र मोदी यांच्यावर केलेल्या टीकेला भाजप नेत्या चित्रा वाघ यांनी जोरदार प्रत्युत्तर दिलं आहे. 103 दिवसांच्या तुरुंगवासाचा आणि पत्राचाळ प्रकरणाचा संदर्भ देत वाघ यांनी राऊतांवर निशाणा साधला.
ADVERTISEMENT
बदलापूर: पंतप्रधान नरेंद्र मोदी यांच्यावर ठाकरे गटाचे खासदार संजय राऊत यांनी केलेल्या टीकेवरून महाराष्ट्रातील राजकीय वातावरण पुन्हा तापलं आहे. भाजप नेत्या चित्रा वाघ यांनी संजय राऊत यांच्या टीकेला जोरदार प्रत्युत्तर देत त्यांच्या तुरुंगवासाचा आणि पत्राचाळ प्रकरणाचा संदर्भ दिला आहे.
‘संजय राऊत काय बोलतात यापेक्षा ते कोणावर बोलत आहेत, हे महत्त्वाचं आहे. 103 दिवस तुरुंगात राहिलेल्यांनी पंतप्रधान नरेंद्र मोदी यांच्यावर बोलावं, हे हास्यास्पद आहे,’ असा टोला चित्रा वाघ यांनी लगावला.
बदलापूरमध्ये भाजपची संघटनात्मक बैठक
बदलापूरमध्ये भाजपच्या वतीने संघटनात्मक बैठकीचे आयोजन करण्यात आले होते. या बैठकीत चित्रा वाघ यांनी महिला पदाधिकाऱ्यांशी संवाद साधला. बैठकीनंतर माध्यमांशी बोलताना त्यांनी संजय राऊत यांनी पंतप्रधान नरेंद्र मोदी यांच्यावर केलेल्या टीकेवर प्रतिक्रिया दिली. यावेळी त्यांनी राऊत यांच्या तुरुंगवासाचा आणि पत्राचाळ प्रकरणाचा उल्लेख करत जोरदार निशाणा साधला.
हे ही वाचा>> दिशा सालियन प्रकरण CBI कडे गेल्यावर आदित्य ठाकरेंनी दिली 'ही' पहिली प्रतिक्रिया
‘103 दिवस तुरुंगात राहिलेले खासदार’
चित्रा वाघ म्हणाल्या की, पंतप्रधान नरेंद्र मोदी यांचा अनेक देशांनी सन्मान केला आहे. अशा पंतप्रधानांवर टीका करणारे संजय राऊत हे 103 दिवस तुरुंगात राहिलेले आणि सध्या जामिनावर बाहेर असलेले खासदार आहेत, असा दावा त्यांनी केला. राऊत यांच्या राजकीय भूमिकेवरही वाघ यांनी टीका केली. ‘संजय राऊत हे निवडून आलेले खासदार नाहीत, तर निवडून दिलेले खासदार आहेत,’ असं त्या म्हणाल्या.