UK तून मराठी तरुण थेट दिल्लीत.. आंदोलनात इंग्लिशमध्ये धडाधड काय बोलला?

CJP Jantar Mantar Protest : दिल्लीतील आंदोलनादरम्यान महाराष्ट्रातील अहिल्यानगरचा एक तरुण आपल्या इंग्रजी भाषणामुळे चर्चेत आला. स्वतः तीन वर्षे यूकेमध्ये मास्टर्स शिक्षण घेतल्याचा आणि स्कॉटिश सरकारमध्ये काम केल्याचा दावा करणाऱ्या या तरुणाने आंदोलनस्थळी केंद्र सरकार, शिक्षण व्यवस्था आणि आंदोलनावर झालेल्या कथित कारवाईवर तीव्र शब्दांत टीका केली. "मी यूकेमध्ये होतो, पण देशाची परिस्थिती पाहून परत आलो. इथं जे दिसत आहे त्याविरोधात आवाज उठवणं गरजेचं वाटलं," असं तो म्हणाला. त्याने सांगितलं की, तो अहिल्यानगरहून तीन दिवसांपासून दिल्लीत आंदोलनात सहभागी असून, आंदोलकांना पाणी, स्वच्छतागृह यांसारख्या मूलभूत सुविधाही उपलब्ध नसल्याचा आरोप त्याने केला. आंदोलन शांततेच्या मार्गाने सुरू असताना विद्यार्थ्यांवर लाठीचार्ज करण्यात आल्याचा दावा करत त्याने याबद्दल संताप व्यक्त केला.