MLA: सत्तेत सहभागी झाले तरी नरहरी झिरवळ म्हणाले, ‘शिवसेनेचे आमदार अपात्र होणार!’

राष्ट्रवादी काँग्रेसचे आमदार सुनील तटकरे यांच्या वाढदिवसानिमित्त शुभेच्छा देण्यासाठी नरहरी झिरवळ हे थेट रायगडला गेले होते. यावेळी झिरवळ यांनी आमदारांच्या अपात्रतेबद्दल एक विधान केलं जे शिवसेनेच्या आमदारांना चांगलंच झोंबलं आहे

झिरवळ म्हणतात… शिवसेनेचे आमदार अपात्र होणारच!

‘एकूण सगळ्या बाजूचा विचार केला तर अपात्रता आहे. पण शेवटचे अधिकार हे अध्यक्षांचे त्या विधीमंडळाचे आहेत. त्यामुळे त्यावर भाष्य करणं मी योग्य नाही.’ असं मोठं विधान नरहरी झिरवळ यांनी रायगडमध्ये बोलताना केलं आहे.

झिरवळांचं ‘ते’ विधान शिवसेनेला झोंबलं!

‘मी नरहरी झिरवळ यांना सुद्धा सांगतो की, आपण अपेक्षेपेक्षा जास्त बोलू नका.. जो तुम्हाला अधिकार नाही ना.. त्या अधिकारावर माणसाने बोलू नये.’ अशी संतप्त प्रतिक्रिया शिवसेनेचे आमदार संजय शिरसाठ यांनी दिली आहे.

अपात्रतेच्या नोटीसला उत्तर देण्यासाठी मागितली मुदतवाढ

दरम्यान, दोनच दिवसांपूर्वी विधानसभा अध्यक्ष राहुल नार्वेकर यांनी आमदारांना अपात्रतेची नोटीस पाठवली होती. मात्र, या नोटीस शिवसेना आमदार तात्काळ उत्तर देणार नसल्याचं म्हटलं आहे. यासाठी त्यांनी मुदतवाढ मागितली आहे.

हे ही वाचा >> शरद पवारांची साथ सोडलेल्या ‘या’ मातब्बर नेत्यांचं काय झालं?, ‘या’ दिग्गजांनी गमावलीय आमदारकी

याबाबत संजय शिरसाठ यांनी असं म्हटलं की, ‘अपात्रतेच्या नोटीशीला कायदेशीर उत्तर देणार. आठवडाभराचा वेळ वाढवून मागणार. आमचे वकील असतील किंवा पक्षाचे वकील असतील.. या सर्वांच्या मार्फत नोटीसचं उत्तर देण्यासाठी काही वेळ लागणार आहे. म्हणून पहिल्यांदा आम्हाल जी काही सात दिवसाची मुदत दिली आहे ती मुदतवाढ मागणार आहोत. त्यांना विनंती करणार आहोत. की, आम्हाला यामध्ये मुदतवाढ द्यावी.’

आता त्यांना मुदतवाढ मिळणार की, विधानसभा अध्यक्ष निर्णयाला आणखी विलंब होऊ नये यासाठी पुढील कार्यवाही करणार का? हे देखील पाहणं महत्त्वाचं ठरणार आहे.

हे ही वाचा >> दिलीप वळसे पाटलांच्या विरोधात पवारांचा ‘हा’ शिलेदार उभं करणार आव्हान?

या सगळ्या राजकीय घडामोडीत आता शिवसेनेचे आमदार नाराज असल्याची सध्या जोरदार चर्चा आहे. आधीच अजित पवार यांचा सत्तेत समावेश आणि दुसरीकडे अपात्रतेची टांगती तलवार यामुळे शिवसेना आमदारांची आता फार मोठी अडचण झाली आहे. अशावेळी आता शिवसेनेचं नेतृत्व म्हणून एकनाथ शिंदे या सगळ्यातून नेमका कसा मार्ग काढणार आणि आपल्या आमदारांची एकजूट कशी ठेवणार याकडेच सगळ्यांचे डोळे लागून राहिले आहेत.