Prakash Ambedkar : “…मग मोदी तुमच्या बोकांडी बसल्याशिवाय राहणार नाही”,’इंडिया’ला मेसेज

नागपुरमधील कार्यक्रमात बोलताना प्रकाश आंबेडकर म्हणाले,”उद्या काय घडेल, काय नाही? हे सांगता येत नाही. कोण म्हणतंय आम्ही 23 जागा लढू, कोण म्हणतंय आम्ही अमूक जागा लढणार… आम्ही त्यांना म्हणतोय की, पहिल्यांदा जागा सोडा… मोदीचं भूत जे बसलंय ते पहिल्यांदा उतरवा. पक्ष वाढवणं हे जागांवरून ठरतं. तुम्हाला पक्ष वाढवायचा की मोदी घालवायचा… याचा पहिल्यांदा निर्णय करा. मोदी घालवायचा असेल, तर दोन-चार जागा कमी आल्या तरी चालतील ही भूमिका असली पाहिजे. नाहीतर मला एवढ्याच जागा पाहिजे, मग मोदी तुमच्या बोकांडी बसल्याशिवाय राहणार नाही आणि तुम्ही तिहार तुरुंगात गेल्याशिवाय राहणार नाही”, असा इशारा प्रकाश आंबेडकर यांनी नागपुरातील सभेत दिला.

Prakash Ambedkar News : इंडिया आघाडीला आवाहन आणि इशारा

“आज मी इंडियात असणाऱ्या नेत्यांना म्हणतोय की, आज असे अनेक प्रश्न आहेत जे आपण उपस्थित करू शकतो. या 56 इंच छातीमध्ये गाठ्या आणि फाफडा एवढेच आहेत, बाकी काहीच नाही. परंतु तुम्ही एकत्र आलात, आमचा भेजा आम्ही तुम्हाला देतो ना”, असा सल्ला प्रकाश आंबेडकर यांनी इंडिया आघाडीतील नेत्यांना दिला.

हेही वाचा >> पुण्यातून लोकसभेची निवडणूक लढवणार की नाही? अखेर फडणवीसांनी दिले उत्तर

“90 साली मुंबईत बॉम्बस्फोट झाले. कुणी केले आपल्या सगळ्यांना माहिती आहे. आता पुन्हा दाऊदचं नाव घेऊन बातम्या येताहेत. मी ‘इंडिया’वाल्यांना म्हणालो, जशा काही तुमच्या चुकलेल्या आहेत, तशा काही गोष्टी नागपूरकरांच्याही चुकलेल्या आहेत. त्यांनी बोट ठेवलं की तुम्ही बोटं ठेवायला शिका. घाबरता कशासाठी? मी असं मानतो की, हा जो संघर्ष आहे, या संघर्षात आपण जिंकलो तर पुन्हा 500-1000 वर्ष ही व्यवस्था चालत राहील, हे लक्षात घ्या”, असे प्रकाश आंबेडकर इंडिया आघाडीला म्हणाले.

लोकसभा 2024 : वंचित बहुजन आघाडीच्या कार्यकर्त्यांना आंबेडकरांनी दिला मेसेज

“एकत्र येतील, न येतील याचं आपल्याला सांगता येत नाही. आले तर फार चांगलं आहे. त्यांचं स्वागत आपण करू, पण आले नाही तरी आपल्याला लढावं लागेल, हे लक्षात घ्या. ते लढायचं असेल तर आजपासून आपण ठरवायला पाहिजे. ते म्हणजे फालतू चर्चा सगळी बंद. एकच चर्चा की, मी ज्या मतदारसंघातील आहे, समजा नागपूरमधील आहे, तर नागपूर लोकसभा, नागपूर ग्रामीण लोकसभा… या आम्ही जिंकल्याशिवाय राहणार नाही, ही खूणगाठ बांधली पाहिजे. ती ताकद आपल्याकडे आहे, नाही असं नाही. फक्त विचलित होऊन चालणार नाही. जे जे करावं लागेल, ते ते आम्ही केल्याशिवाय आम्ही राहणार नाही”, असे सांगत प्रकाश आंबेडकरांनी लोकसभा निवडणूक ताकदीने लढण्याचा निर्धार नागपुरातील सभेत केला.

हेही वाचा >> अजित पवारांना लोकसभा निवडणुकीआधीच पिंपरी चिंचवडमध्ये धक्का, विश्वासू नेता ठाकरेंच्या शिवसेनेत

“ते जिंकायचं असेल, तर आधी लक्षात घ्या जे बूथ… 800-1200 मतदानाचं बूथ आहे, त्या बूथवर मी ज्या पक्षाला पाठिंबा देईल, त्या पक्षाला किमान 500 मते जातील हे मी बघेन. मग विकत घ्यावे लागले तर विकत घेईन. मैत्री करून घ्यावे लागले, तर मैत्री करून घेईन. पण, घेईनच ही खूणगाठ बांधली पाहिजे. उमेदवार येईल न येईल. उमेदवाराची वाट न बघता, मीच उमेदवार आहे, हे ठरवून आपण निवडणुकीत उतरलं पाहिजे”, असा मेसेज प्रकाश आंबेडकरांनी आपल्या कार्यकर्त्यांना दिला.