अजित पवारांचा राष्ट्रवादीमध्येच ‘कार्यक्रम’, शरद पवारांच्या खेळीचा अर्थ काय?
सुळे यांच्याकडे सोपवण्यात आलेल्या राज्यांमध्ये अजित पवारांचे कार्यक्षेत्र असलेल्या महाराष्ट्राचा समावेश आहे.
ADVERTISEMENT
Maharashtra Politics, Sharad Pawar And Ajit Pawar : राष्ट्रवादी काँग्रेसचे अध्यक्ष शरद पवार यांनी 10 जून रोजी कन्या सुप्रिया सुळे आणि माजी केंद्रीय मंत्री प्रफुल्ल पटेल यांची पक्षाच्या कार्याध्यक्षपदी नियुक्ती केली आणि पक्षातील (NCP) नेत्यांच्या वर्चस्व वादाला नवे वळण मिळाले. सुप्रिया सुळे याच पवारांच्या राजकीय उत्तराधिकारी असतील हेच यानिमित्ताने स्पष्ट झालं. पण, सगळ्यांच्या नजरा त्यांचे चुलत भाऊ आणि महाराष्ट्रातील विरोधी पक्षनेते अजित पवार यांच्याकडे आहेत. अजित यांनी त्यांच्या चुलत बहीण असलेल्या सुप्रिया सुळे यांची राष्ट्रवादी काँग्रेसमध्ये क्रमांक दोनच्या पदावर झालेल्या नियुक्तीवर तात्काळ प्रतिक्रिया देणे टाळले. अजित पवार इतकेच म्हणाले की, “मी खूप समाधानी आहे. जे कयास लावले जात आहेत, ते अनावश्यक आहेत.” अजित पवारांनी नवनियुक्त पदाधिकाऱ्यांच्या समर्थनार्थ ट्विटही केले.
2 मे रोजी शरद पवार यांनी पक्षाच्या राष्ट्रीय अध्यक्षपदाचा त्याग करणार असल्याची घोषणा करून राष्ट्रवादीचे नेते आणि समर्थकांना आश्चर्यचकित केले. त्यावेळी, त्यांचे पुतणे असलेले अजित पवार यांच्या नेतृत्वाखालील राष्ट्रवादीतील एक गट महाराष्ट्र विकास आघाडीशी (एमव्हीए) संबंध तोडून भाजपशी हातमिळवणी करण्यास आतुर असल्याचे सांगण्यात आले. त्यामुळे कार्यकर्त्यांमध्ये उत्साह निर्माण व्हावा आणि अजित पवार यांना त्यांची जागा दाखवावी या उद्देशाने पवारांनी हे पाऊल उचलल्याचे बोलले गेले. पवारांच्या घोषणेचा उद्देश पूर्ण झाला. निराशा आणि नैराश्याच्या आक्रोशात राष्ट्रवादी काँग्रेसचे पदाधिकारी आणि कार्यकर्ते आणि इतर पक्षांच्या अनेक राष्ट्रीय नेत्यांनीही शरद पवारांना त्यांच्या निर्णयाचा पुनर्विचार करण्याची विनंती केली. त्यामुळे पवार आणखी शक्तिशाली म्हणून वर आले आणि त्यांनी 5 मे रोजी आपला निर्णय मागे घेतला.
भाजपशी हातमिळवणी अन्…
अजित पवारांनी भाजपशी हातमिळवणी करण्याचे प्रयत्न करत असल्याचे वृत्त नाकारले. पण, तरीही अनेक प्रकरणांमध्ये केंद्रीय तपास यंत्रणांच्या चौकशीला सामोरे जाणाऱ्या राष्ट्रवादीच्या नेत्यांचा एक गटाच्या मनात भाजपसोबत जाण्याची इच्छा आहे. अजित पवार हे भाजपच्या उंबरठ्यावर असल्याचे भाजपचे ज्येष्ठ नेते आणि केंद्रीय मंत्री नारायण राणे यांनी म्हटले होते.
हेही वाचा >> Ravindra Chavan : “एकनाथ शिंदेंच्या बंडाचं भाजपने दिल्लीत केले प्लानिंग, फडणवीस होते…”
राष्ट्रवादी पक्षाचे अनेक आमदार अजित पवार यांच्याशी एकनिष्ठ असल्याचेही बोलले जात होते. विशेष म्हणजे, पवारांनी त्यांच्या आत्मचरित्राच्या नवीन आवृत्तीच्या प्रकाशनाच्या वेळी राजीनामा देण्याचा निर्णय जाहीर केल्यानंतर पवारांच्या निर्णयाला पाठिंबा देणारे अजित हे एकमेव राष्ट्रवादी नेते होते. त्याचबरोबर पवारांना पदावर कायम राहण्याची विनंती करणाऱ्या नेत्यांनाही त्यांनी खडसावले होते. त्यामुळे ते एकटे पडल्याचे दिसून आले. पवार यांनी राजीनामा मागे घेण्याची घोषणा केलेल्या पत्रकार परिषदेलाही अजित पवार अनुपस्थित होते.
हे वाचलं का?
