'सफदरजंग रुग्णालयावर विश्वास नाही...' वांगचुक यांच्या पत्नीची उच्च न्यायालयात धाव
सोनम वांगचुक यांच्या पत्नी गीतांजली आंगमो यांनी दिल्ली उच्च न्यायालयाचे दरवाजे ठोठावले आहेत. सफदरजंग रुग्णालयाच्या वैद्यकीय अहवालांवर आणि उपचारांवर आपला अजिबात विश्वास नसल्याचे त्यांनी सांगितले.
ADVERTISEMENT
बातम्या हायलाइट
'सफदरजंग रुग्णालयावर विश्वास नाही...'
वांगचुक यांच्या पत्नीची उच्च न्यायालयात धाव
Sonam Wangchuk : सामाजिक कार्यकर्ते सोनम वांगचुक यांच्या पत्नी गीतांजली आंगमो यांनी दिल्ली उच्च न्यायालयाचे दरवाजे ठोठावले आहेत. सफदरजंग रुग्णालयाच्या वैद्यकीय अहवालांवर आणि उपचारांवर आपला अजिबात विश्वास नसल्याचे सांगत, त्यांनी वांगचुक यांना त्वरित इतर कोणत्याही खाजगी किंवा पसंतीच्या रुग्णालयात स्थलांतरित करण्याची परवानगी देण्याची मागणी केली आहे. वांगचुक यांना उपचाराच्या नावाखाली बेकायदेशीरपणे ताब्यात ठेवण्यात आले असून, जंतर-मंतर येथे त्यांच्या बेमुदत उपोषणाच्या 21 व्या दिवशी त्यांना जबरदस्तीने सफदरजंग रुग्णालयात नेण्यात आल्याचा दावा त्यांनी केला आहे. रुग्णालयात वांगचुक यांना त्यांचे कुटुंबीय, वकील आणि गेल्या 20 दिवसांपासून त्यांच्या प्रकृतीवर लक्ष ठेवणाऱ्या डॉक्टरांनाही भेटू दिले जात नसल्याचा आरोप याचिकेत करण्यात आला आहे. ही कोठडी असंवैधानिक असून ती कलम 19 आणि 21 चे उल्लंघन करणारी आहे, त्यामुळे त्यांना तातडीने रुग्णालयातून सोडण्यात यावे, अशी विनंती त्यांनी न्यायालयाला केली आहे.
वैद्यकीय अहवालांवर आक्षेप
गीतांजली आंगमो यांनी सोशल मीडियाच्या माध्यमातून रुग्णालयाच्या कारभारावर आणि वैद्यकीय अहवालांवर गंभीर प्रश्न उपस्थित केले आहेत. रुग्णालयाने सुरुवातीला कुटुंबीयांना सांगितले होते की वांगचुक यांच्या शरीरातील पोटॅशियमची पातळी 2.9 पर्यंत खाली आली आहे, जी अत्यंत चिंताजनक आणि जीवघेणी मानली जाते. मात्र, रुग्णालयाने जाहीर केलेल्या सार्वजनिक हेल्थ बुलेटिनमध्ये हा नेमका आकडा न दाखवता केवळ "पोटॅशियमची पातळी कमी होत आहे" असे लिहून खरी माहिती लपवण्याचा प्रयत्न केला. या विसंगतीमुळे संशय आल्याने कुटुंबीयांनी अनेक तास प्रशासनाकडे मागणी लावून धरली. अखेर रात्री साडेदहाच्या सुमारास त्यांना स्वतंत्र खाजगी लॅबमधून रक्ताच्या नमुन्यांची तपासणी करण्याची परवानगी मिळाली. या स्वतंत्र तपासणीच्या अहवालात पोटॅशियमची पातळी 3.5 असल्याचे समोर आले, जी सामान्य मर्यादेत मानली जाते. याच आधारावर गीतांजली यांनी सफदरजंग रुग्णालयाच्या वैद्यकीय अहवालांवर आक्षेप घेतला आहे.
हे ही वाचा : नांदेड हादरले! शिक्षक अन् 2 मुलांच्या आत्महत्या प्रकरणात ट्वीस्ट, पोस्टमॉर्टेममधून धक्कादायक खुलासा
100 हून अधिक सुरक्षा कर्मचारी
कुटुंबियांनी वारंवार विनंत्या करूनही रुग्णालय प्रशासन सोनम वांगचुक यांना डिस्चार्ज देण्यास किंवा दुसऱ्या कोणत्याही खाजगी रुग्णालयात हलवण्यास नकार देत असल्याचा आरोप गीतांजली यांनी केला आहे. सध्या वांगचुक ज्या मजल्यावर दाखल आहेत, तिथे सुमारे 30 पोलीस तैनात करण्यात आले असून संपूर्ण रुग्णालय परिसरात 100 हून अधिक सुरक्षा कर्मचाऱ्यांचा पहारा आहे. या कडक बंदोबस्तामुळे कुटुंबियांच्या येण्या-जाण्यावर आणि हालचालींवरही मोठ्या मर्यादा आल्या आहेत. हा प्रकार वैद्यकीय उपचार नसून केवळ प्रशासकीय आणि कायदेशीर अधिकारांचा गैरवापर करून वांगचुक यांना बेकायदेशीर कोठडीत ठेवण्याचा प्रकार आहे, अशी उद्विग्नता त्यांनी व्यक्त केली आहे. तसेच, या परिस्थितीत जर सोनम वांगचुक यांच्या आरोग्याला किंवा जिवाला काहीही धोका निर्माण झाला, तर त्याला पूर्णपणे रुग्णालय प्रशासन आणि सरकारच जबाबदार असेल, असा इशाराही त्यांनी दिला आहे.
हे ही वाचा : पोलिसांनी उपोषणस्थळावरुन ताब्यात घेतल्यानंतर सोनम वांगचुक यांची पहिली पोस्ट, पत्नीमार्फत दिला मेसेज
तातडीची सुनावणी होणार का?
या संपूर्ण संवेदनशील आणि गंभीर प्रकरणाची दखल घेत दिल्ली उच्च न्यायालयाकडे तातडीने सुनावणी घेण्याची मागणी करण्यात आली आहे. सोनम वांगचुक यांच्या आरोग्याचा आणि त्यांच्या मूलभूत हक्कांचा प्रश्न असल्याने न्यायालय यावर काय भूमिका घेते याकडे सर्वांचे लक्ष लागले आहे. न्यायालयाच्या आगामी निर्णयावरच हे स्पष्ट होईल की वांगचुक यांना सफदरजंग रुग्णालयातच उपचार घ्यावे लागतील की त्यांना कुटुंबियांच्या इच्छेनुसार दुसऱ्या सुरक्षित रुग्णालयात हलवण्याची परवानगी दिली जाईल.
