टीम इंडियावर आता मुंबईच्या ‘हिटमॅन’ची सत्ता, कसोटी संघाचं कर्णधारपद रोहितकडे

३४ वर्षीय रोहित शर्मासमोर पहिली परीक्षा ही मार्च महिन्यात असणार आहे. श्रीलंकेचा संघ भारत दौऱ्यावर येत असून तो मार्च महिन्यात दोन कसोटी सामने खेळणार आहे. वेस्ट इंडिजविरुद्ध अखेरचा टी-२० सामना २० फेब्रुवारीला संपल्यानंतर भारतीय संघ २४ तारखेपासून श्रीलंकेविरुद्ध ३ टी-२० सामन्यांची मालिका खेळेल. काही दिवसांपासून कसोटी संघासाठी लोकेश राहुल, जसप्रीत बुमराह, ऋषभ पंत या नावांचा विचार केला जात असला तरीही बीसीसीआय आणि निवड समितीने अनुभवी रोहित शर्मालाच आपली पसंती दिली आहे.

आतापर्यंत ४३ कसोटी सामन्यांमध्ये रोहित शर्माच्या नावावर ३ हजार ४७ धावा जमा आहेत. कसोटी क्रिकेटमध्ये रोहितची सरासरी ४६.८७ असून त्याच्या नावावर कसोटीत ८ शतकं आणि १४ अर्धशतकं जमा आहेत. त्यामुळे रोहित शर्माच्या नेतृत्वाखाली भारतीय संघ कसोटी क्रिकेटमध्ये कशी कामगिरी करतो हे पाहणं महत्वाचं ठरणार आहे.