लातूर हादरलं, दारु -सिगारेट फुकट न दिल्याचा राग, बार मालकाला जागेवर संपवलं; जाताना विदेशी दारु पळवली

नायगाव–मुळकी–उमरगा मार्गावर नायगाव शिवारात गजानन नामदेव कासले (वय 42) यांचे बिअर बार अँड रेस्टॉरंट आहे. शुक्रवारी रात्री सुमारे साडेअकराच्या सुमारास दोन मोटारसायकलवरून आलेले तीन जण हॉटेलमध्ये दाखल झाले. सुरुवातीला त्यांनी दारू आणि सिगारेटची मागणी केली. मात्र, फुकट देण्यास गजानन कासले यांनी नकार दिला. यामुळे तिघेही आक्रमक झाले आणि त्यांनी शिवीगाळ करत दमदाटी सुरू केली.

वाद वाढताच आरोपींनी अचानक काठ्यांनी हल्ला चढवला. गजानन कासले यांच्या डोक्यावर जोरदार प्रहार करण्यात आला. हल्ल्याची तीव्रता इतकी होती की कासले हे रक्तबंबाळ अवस्थेत खाली कोसळले आणि त्यांचा जागीच मृत्यू झाला. या वेळी हॉटेलमध्ये काम करणारे अजय भरत मोरे (वय 28, रा. अजनी, ता. अहमदपूर) हेही मध्ये पडण्याचा प्रयत्न करत असताना आरोपींनी त्यांनाही बेदम मारहाण केली. अजय मोरे हे गंभीर जखमी असून त्यांच्यावर उपचार सुरू आहेत.

हल्ल्यानंतर आरोपींचा हिंसक प्रकार इतक्यावरच थांबला नाही. त्यांनी हॉटेलमधील टीव्हीची तोडफोड केली. तसेच गल्ल्यात ठेवलेले अंदाजे 10 ते 15 हजार रुपयांचे रोख पैसे आणि विदेशी दारूच्या बाटल्या चोरून ते घटनास्थळावरून पसार झाले. ही संपूर्ण घटना हॉटेलमध्ये बसवलेल्या सीसीटीव्ही कॅमेऱ्यात कैद झाली असून, त्याच्या आधारे पोलिस तपासाला वेग देण्यात आला आहे.

या प्रकरणी मयत गजानन कासले यांचे भाऊ बालाजी कासले यांनी दिलेल्या फिर्यादीवरून चाकूर पोलीस ठाण्यात तीन अज्ञात आरोपींविरोधात गुन्हा दाखल करण्यात आला आहे. घटनेची माहिती मिळताच उपविभागीय पोलीस अधिकारी रवींद्र चौधर आणि पोलीस निरीक्षक बालाजी भंडे यांनी घटनास्थळी भेट दिली. डॉग स्कॉड आणि ठसेतज्ज्ञांना पाचारण करून आरोपींचा शोध सुरू करण्यात आला आहे. पुढील तपास पोलीस उपनिरीक्षक आर. टी. चव्हाण हे पोलीस निरीक्षक बालाजी भंडे यांच्या मार्गदर्शनाखाली करीत आहेत.

दरम्यान, गजानन कासले यांचा मृतदेह पंचनामा करून शवविच्छेदनासाठी चाकूर ग्रामीण रुग्णालयात पाठवण्यात आला होता. शवविच्छेदनानंतर शनिवारी दुपारी दोनच्या सुमारास नायगाव येथील सार्वजनिक स्मशानभूमीत त्यांच्या पार्थिवावर अंत्यसंस्कार करण्यात आले. त्यांच्या पश्चात आई, वडील, पत्नी, दोन मुले, भाऊ व वहिनी असा परिवार आहे. या क्रूर घटनेमुळे नायगावसह परिसरात खळबळ उडाली असून, दारूच्या कारणावरून झालेल्या या हत्येने कायदा व सुव्यवस्थेचा गंभीर प्रश्न उपस्थित झाला आहे. पोलिसांकडून आरोपींच्या अटकेसाठी जोरदार प्रयत्न सुरू आहेत.

इतर महत्त्वाच्या बातम्या 

Survey: मुंबईत ठाकरेंना बसणार मोठा फटका, मुस्लिम मतदारांचा 'तो' निर्णय सेना-मनसेचं वाढवणार प्रचंड टेन्शन!