मिसिंग लिंकवरुन जाण्यास 'या' वाहनांना बंदी, वेग मर्यादा किती? कधी होणार खुला? शासनाकडून अधिसूचना जारी

वाहतुकीचे टप्पे आणि बंदीचे निकष

मिसिंग लिंक प्रकल्पाच्या अंमलबजावणीसाठी प्रशासनाने दोन टप्पे निश्चित केले आहेत. पहिल्या टप्प्यात 1 मे 2026 ते 31 ऑक्टोबर 2026 या सहा महिन्यांच्या कालावधीत केवळ हलकी मोटार वाहने (LMV), बसेस आणि प्रवासी वाहनांनाच या बोगद्यातून प्रवास करण्याची मुभा असेल. या काळात सर्व प्रकारच्या मालवाहू वाहनांना या मार्गावर पूर्णपणे बंदी घालण्यात आली आहे. दुसऱ्या टप्प्यात म्हणजे 1 नोव्हेंबर 2026 पासून, सुरुवातीच्या सहा महिन्यांच्या निरीक्षणाअंती मालवाहू वाहनांना प्रवेश देण्याबाबतचा निर्णय घेतला जाईल. विशेष म्हणजे, ज्वलनशील, स्फोटक किंवा इतर कोणत्याही प्रकारच्या धोकादायक वस्तू (HAZ-MAT) वाहून नेणाऱ्या वाहनांना या नवीन मार्गावर कायमस्वरूपी बंदी असेल. अशा वाहनांनी प्रवासासाठी जुन्याच द्रुतगती मार्गाचा वापर करणे अनिवार्य करण्यात आले आहे.

हेही वाचा : 'भाजपचं जिल्हा उपाध्यक्ष व्हायचं असेल तर माझ्यासोबत चल..', जिल्हाध्यक्षाने शरीरसुखाची मागणी केल्याचा आरोप

वेगमर्यादा आणि दंडात्मक तरतुदी

बोगद्यामधील प्रवासाचा वेग नियंत्रित ठेवण्यासाठी शासनाने कडक वेगमर्यादा निश्चित केली आहे. या नवीन मार्गावर हलकी मोटार वाहने ताशी 100 किलोमीटरच्या कमाल वेगाने धावू शकतील, तर बसेस आणि इतर प्रवासी वाहनांसाठी ही मर्यादा ताशी 80 किलोमीटर इतकी ठेवण्यात आली आहे. तथापि, वाहनाचा वेग या निश्चित केलेल्या मर्यादेपेक्षा केवळ 5 टक्क्यांपर्यंत अधिक आढळल्यास मोटार वाहन अधिनियम 1988 च्या कलम 183 अन्वये कोणतीही दंडात्मक कारवाई केली जाणार नाही, असा दिलासाही अधिसूचनेत देण्यात आला आहे. वेगमर्यादेचे हे नियम प्रवाशांचा प्रवास सुरक्षित व्हावा आणि बोगद्यातील तांत्रिक बाबींचे जतन व्हावे या उद्देशाने आखण्यात आले आहेत.

सुरक्षितता आणि पुढील अंमलबजावणी

जोपर्यंत प्रशासनाकडून पुढील आदेश येत नाहीत, तोपर्यंत हे वाहतूक नियमन नियम लागू राहतील. मिसिंग लिंकमुळे मुंबई आणि पुणे दरम्यानचा प्रवासाचा वेळ वाचणार असला, तरी प्रवाशांनी नवीन नियमांचे पालन करणे आवश्यक आहे. सार्वजनिक सुरक्षिततेसाठी आणि बोगद्यामधील वाहतुकीचे सुव्यवस्थित नियोजन करण्यासाठीच हे निर्बंध घालण्यात आले असून, वाहनधारकांनी प्रशासनाला सहकार्य करावे, असे आवाहन या अधिसूचनेद्वारे करण्यात आले आहे.

इतर महत्त्वाच्या बातम्या 

दिल्लीहून आला महत्त्वाचा निरोप अन् तारीखही ठरली; भाजप विधानपरिषदेवर कोणा-कोणाला पाठवणार?