नागपूर : नायब तहसीलदारांना चालत्या जेसीबीला लटकवून 4 किलोमीटरपर्यंत नेले, मुरुम माफीयांची दहशत

जेसीबी न थांबवता तहसीलदारांना लटकवले; थरारक पाठलाग आणि माफ्यांचा धुमाकूळ

कारवाईच्या दरम्यान नायब तहसीलदार बुद्धभूषण निकाळजे यांनी अवैध उत्खनन करणारा जेसीबी थांबवण्याचा प्रयत्न केला असता, चालकाने वाहन न थांबवता त्याचा वेग वाढवला. यावेळी निकाळजे यांनी जेसीबीला रोखण्याचा प्रयत्न केला असता त्यांना चालत्या जेसीबीला लटकवून तब्बल 3 ते 4 किलोमीटरपर्यंत नेण्यात आले. माफियांनी त्यांना गंभीर दुखापत करण्याचा आणि जेसीबीवरून पाडण्याचा जाणीवपूर्वक प्रयत्न केला. हा थरार बराच वेळ सुरू होता, मात्र काही अंतरावर पोलिसांची वाहने येताना दिसताच जेसीबी चालकाने घाबरून वाहन सोडून दिले आणि तिथून पळ काढला. महसूल विभागाच्या एका जबाबदार अधिकाऱ्याला अशा प्रकारे सार्वजनिक ठिकाणी जीवे मारण्याचा प्रयत्न होणे, ही अतिशय गंभीर बाब मानली जात आहे.

कुही पोलिसांकडून तातडीने कारवाई; मुख्य आरोपी जेसीबी चालकास बेड्या

या धक्कादायक घटनेची माहिती मिळताच कुही पोलीस स्टेशनचे पथक तातडीने घटनास्थळी दाखल झाले आणि त्यांनी परिस्थिती हाताळली. नायब तहसीलदार बुद्धभूषण निकाळजे यांनी दिलेल्या तक्रारीवरून आणि प्रत्यक्षदर्शींच्या पुराव्यावरून पोलिसांनी गुन्हा दाखल केला आहे. पोलिसांनी या प्रकरणात वेगाने तपास चक्रे फिरवून बुधवारी मुख्य आरोपी आणि जेसीबी चालक मयूर थोटे याला अटक केली आहे. शासकीय कामात अडथळा निर्माण करणे आणि महसूल अधिकाऱ्याच्या जीविताला धोका निर्माण केल्याप्रकरणी त्याच्यावर विविध कलमान्वये कारवाई करण्यात येत आहे. या हल्ल्यात सामील असलेल्या इतर संशयितांचाही शोध पोलीस घेत असून मुरूम माफियांचे हे धाडस पाहून स्थानिक नागरिकांमध्ये भीतीचे वातावरण आहे.

 प्रशासकीय अधिकाऱ्यांच्या सुरक्षिततेचा प्रश्न; मुरूम उपसा रोखण्यासाठी गेलेल्या पथकावर हल्ला

या अमानवी हल्ल्यानंतर कुही तालुक्याचे नायब तहसीलदार बुद्धभूषण निकाळजे यांनी आपल्या भावना व्यक्त करताना सांगितले की, अवैध कामांवर आळा घालण्यासाठी गेलेल्या पथकावर अशा प्रकारे हल्ला होणे हे दुर्दैवी आहे. बोरी नाईक परिसरातील या घटनेने अवैध उत्खनन करणाऱ्यांचे धाडस किती वाढले आहे, हे पुन्हा एकदा चव्हाट्यावर आले आहे. महसूल पथकाने रात्रीच्या वेळी धाड टाकली असली तरी माफियांनी संघटितपणे हा विरोध केला. सध्या पोलीस या प्रकरणाचा सखोल तपास करत असून अटकेत असलेल्या आरोपीची चौकशी सुरू आहे.

इतर महत्वाच्या बातम्या 

डोंबिवली हादरलं! मित्राचा रुग्णालयात मृत्यू, आई-वडील बाहेरगावी असताना तरुणानं गळफास घेत संपवलं जीवन