पेरूचं आमिष, आवाज नको म्हणून... जुन्नरच्या घटनेची हादरवून टाकणारी इनसाईड स्टोरी

आजारी असल्याने मुलगी घरीच 

घटनेच्या दिवशी मुलीची तब्येत ठीक नव्हती. व्हायरल इन्फेक्शन झाल्यामुळे ती शाळेत गेली नव्हती. तिचे आई-वडील रोजंदारीच्या कामासाठी सकाळी घराबाहेर गेले होते. त्यामुळे दुपारच्या वेळी मुलगी घरी एकटीच होती आणि टीव्ही पाहत होती.

दुपारी साधारण तीन ते साडेतीनच्या सुमारास तिच्या घरासमोर राहणारा 24 वर्षीय तरुण तिच्याकडे आला. मुलगी त्याला आधीपासून ओळखत होती. दोन्ही कुटुंबे एकमेकांच्या परिचयाची असल्याने त्याच्यावर मुलीचा विश्वास असण्याची शक्यता होती.

हे ही वाचा>> पुणे : घरात एकट्या असलेल्या मुलीवर शेतात नेऊन अत्याचार अन् मर्डर, 'त्या' चुकीने आरोपी सापडला

या तरुणाने मुलीला पेरूच्या बागेत चल, तुला पेरू काढून देतो, असे सांगितले. त्यानंतर तो तिला सायकलवर बसवून घेऊन गेला. संध्याकाळी आई-वडील घरी आले अन् मुलगी गायब असल्याचं लक्षात आलं

काही वेळाने तरुण परतला. मात्र मुलगी त्याच्यासोबत नव्हती. संध्याकाळी आई-वडील कामावरून घरी परतल्यानंतर मुलगी घरात नसल्याचे त्यांच्या लक्षात आले. तिचा शोध सुरू करण्यात आला. कुटुंबीयांनी गावात आणि परिसरात चौकशी केली. मात्र तिचा काहीच ठावठिकाणा लागला नाही. अखेर पोलिसांकडे मुलगी बेपत्ता असल्याची तक्रार देण्यात आली.

सीसीटीव्हीने तपासाला मिळाली महत्त्वाची दिशा

पोलिसांनी तपास सुरू केल्यानंतर गावातील विविध ठिकाणचे सीसीटीव्ही फुटेज तपासण्यास सुरुवात केली. गावातील मुख्य भागातील तसेच रस्त्यालगतच्या दुकानांवरील सीसीटीव्ही कॅमेऱ्यांचे फुटेज तपासण्यात आले.

याच तपासात एक महत्त्वाचा सीसीटीव्ही फुटेज पोलिसांच्या हाती लागला. त्यामध्ये एक तरुण सायकलवरून जाताना आणि त्याच्या मागे एक मुलगी बसलेली असल्याचे दिसून आले.

हे ही वाचा>> नागपूर : हॉटेलची रुम सजवली, बेडवर गुलाबाच्या पाकळ्या..,लव्ह रक्तरंजित एन्ड

या फुटेजवरून पोलिसांनी संबंधित तरुणाची ओळख पटवली. विशेष म्हणजे मुलीचा शोध घेत असतानाही हा तरुण इतर गावकऱ्यांसोबत शोधमोहीमेत सहभागी असल्याचे सांगितले जात आहे.

पोलिसांच्या चौकशीत संशय बळावला

सीसीटीव्ही फुटेज समोर आल्यानंतर पोलिसांनी त्या तरुणाची चौकशी केली. त्याने मुलगी काही काळ आपल्यासोबत असल्याचे मान्य केले. मात्र, त्यानंतर तिला पेरूच्या बागेत सोडल्याचा दावा केल्याचे समोर आले.

मुलगी नेमकी कुठे आणि कधी वेगळी झाली, याबाबत त्याच्या उत्तरांमध्ये विसंगती आढळल्याने पोलिसांचा संशय अधिक बळावला. त्यानंतर त्याला अधिक चौकशीसाठी ताब्यात घेण्यात आले.

चौकशीदरम्यान पोलिसांनी त्याला घटनास्थळाच्या दिशेने नेले. गावाच्या रस्त्याच्या पुढील बाजूस असलेल्या उसाच्या शेतात तपास केला असता मुलीचा मृतदेह आढळून आला. यानंतर पोलिसांनी आरोपीला ताब्यात घेतले.

पोस्टमॉर्टममधून धक्कादायक बाब समोर

मुलीच्या मृतदेहाचे पोस्टमॉर्टम करण्यात आले. प्राथमिक माहितीनुसार, तिचा मृत्यू गळा दाबल्यामुळे झालेल्या श्वासरोधामुळे (Suffocation) झाल्याचे अहवालातून समोर आले. तसेच तिच्यावर लैंगिक अत्याचार झाल्याचेही तपासात स्पष्ट झाल्याचे सांगितले जात आहे.

तपासातील माहितीनुसार, मुलीने आरडाओरड करू नये किंवा घटनेची माहिती कोणाला मिळू नये, या उद्देशाने आधी तिची हत्या करण्यात आली आणि त्यानंतर तिच्यावर अत्याचार करण्यात आल्याचा संशय तपास यंत्रणेकडून व्यक्त करण्यात आला आहे. या घटनेने  प्रकरणाचे गांभीर्य आणखी वाढले आहे.

आरोपीच्या पूर्वीच्या वर्तनाचीही चौकशी

तपास पुढे जात असताना गावातील काही महिलांनी संबंधित तरुणाच्या पूर्वीच्या वर्तनाबाबत पोलिसांना माहिती दिल्याचे सांगितले जात आहे.

काही महिलांच्या म्हणण्यानुसार, तो त्यांचा पाठलाग करत असे. तसेच महिलांच्या खासगीपणावर अतिक्रमण करणारे प्रकार केल्याचेही आरोप समोर आले आहेत. काही ठिकाणी महिलांचे चित्रीकरण करण्याचा प्रयत्न केल्याचेही सांगितले जात आहे.

मात्र या सर्व बाबींची स्वतंत्रपणे चौकशी होणे आणि त्यासंदर्भातील पुरावे तपासातून समोर येणे महत्त्वाचे आहे.

आरोपीने चौकशीत काय सांगितलं?

पोलिसांच्या चौकशीदरम्यान आरोपीने आपल्या वैयक्तिक आणि लैंगिक इच्छांबाबत काही कारणे सांगितल्याचे या घटनेच्या तपासाशी संबंधित माहितीतून समोर आले आहे. मात्र कोणतेही वैयक्तिक कारण किंवा मानसिक अवस्था एखाद्या गंभीर गुन्ह्याचे समर्थन ठरू शकत नाही.

आरोपीविरोधात यापूर्वी गुन्हा दाखल असल्याची माहिती समोर आलेली नसली, तरी त्याच्या पूर्वीच्या वर्तनाबाबत आता पोलिसांकडून अधिक तपास केला जात आहे.

सीसीटीव्ही ठरणार महत्त्वाचा डिजिटल पुरावा

या प्रकरणाच्या पुढील तपासात सीसीटीव्ही फुटेज महत्त्वाचा पुरावा ठरू शकतो. मुलीला आरोपी सायकलवरून घेऊन जात असल्याचे फुटेज पोलिसांच्या हाती लागले आहे. त्यामुळे घटनाक्रमातील आरोपीची हालचाल निश्चित करण्यासाठी हे फुटेज महत्त्वाचे ठरणार आहे.

याशिवाय आरोपीला त्या दिवशी कोणकोणत्या व्यक्तींनी पाहिले, तो कोणत्या मार्गाने गेला आणि घटनास्थळाच्या आसपास त्याची हालचाल कशी होती, याचीही माहिती पोलिसांकडून गोळा केली जात आहे.

सीसीटीव्ही, प्रत्यक्षदर्शींची माहिती, पोस्टमॉर्टम अहवाल आणि इतर फॉरेन्सिक पुरावे या सर्वांचा तपासात महत्त्वाचा आधार ठरण्याची शक्यता आहे.

पोलिसांकडून जलद चार्जशीटचा प्रयत्न

या प्रकरणात जलदगतीने तपास पूर्ण करून चार्जशीट दाखल करण्याचा पोलिसांचा प्रयत्न असल्याचे सांगितले जात आहे. या प्रकरणाची गंभीरता लक्षात घेऊन तपासातील पुरावे वेगाने संकलित केले जात असून, आरोपीला कठोरात कठोर शिक्षा मिळावी यासाठी कायदेशीर प्रक्रिया मजबूत करण्यावर भर दिला जात आहे.

दरम्यान, जुन्नर परिसरातील नागरिकांमध्ये या घटनेबाबत तीव्र संताप आहे. अल्पवयीन मुलीवरील अत्याचार आणि हत्येच्या या प्रकरणात आरोपीला कठोर शिक्षा व्हावी, अशी मागणी स्थानिकांकडून केली जात आहे.

आता पुढचा तपास महत्त्वाचा

या संपूर्ण प्रकरणात आरोपीचा दावा, सीसीटीव्ही फुटेज, घटनास्थळावरून मिळणारे पुरावे, पोस्टमॉर्टम अहवाल आणि इतर फॉरेन्सिक पुरावे यांची सांगड घालणे तपासासाठी अत्यंत महत्त्वाचे ठरणार आहे.

एका आजारी मुलीला पेरूच्या बागेत घेऊन जाण्याच्या आमिषापासून सुरू झालेला हा घटनाक्रम अखेर तिच्या मृतदेहाच्या शोधापर्यंत पोहोचला. त्यामुळे या प्रकरणातील प्रत्येक पुरावा आणि आरोपीच्या जबाबाची पडताळणी आता निर्णायक ठरणार आहे.