दरम्यान, चार महिन्यांपासून अडकलेल्या या जहाजाच्या मालकावर आधीपासूनच गुन्हा दाखल असून तो सध्या परदेशात फरार आहे. तसेच या जहाजाचा वापर बेकायदेशीर तेल व्यापारासाठी केला जात असल्याचा दावा समोर आला असून, पोलीस या दिशेनेही तपास करत आहेत.

दोनदा चोरी, तिसऱ्यांदा गेले अन्...

तपासादरम्यान या जहाजावर यापूर्वीही चोरीच्या दोन घटना घडल्याचे निष्पन्न झाले आहे. पहिल्या वेळी चोरांनी जहाजातून सुमारे अडीच लाख रुपयांचे सामान चोरले होते, तर दुसऱ्या वेळी सुमारे पाच लाख रुपयांचा ऐवज लांबवल्याचा दावा केला जात आहे. यानंतर तिसऱ्यांदा चोरी करण्याच्या इराद्याने सुमारे आठ जणांची टोळी स्पीडबोटच्या साहाय्याने जहाजापर्यंत पोहोचली होती. त्यापैकी एक जण स्पीडबोटवरच थांबला, तर उर्वरित सात जण जहाजाच्या आत शिरले होते.

हे ही वाचा : 'अजितदादांच्या घातपात प्रकरणी VSR ला वाचवणारा मफलरवाला नेता राज्यातीलच', रोहित पवारांचा प्रचंड मोठा गौप्यस्फोट

विषारी वायूमुळे मृत्यू?

जहाजात शिरलेल्या सात जणांपैकी चौघे जण आतील भागातील पाईप कापण्यासाठी गेले होते. याच दरम्यान जहाजाच्या आत गॅस गळती झाली किंवा ऑक्सिजनची कमतरता निर्माण झाली. यामुळे विषारी वायू अथवा गुदमरल्यामुळे या चौघांचा जागीच मृत्यू झाल्याची प्राथमिक माहिती समोर आली आहे. घटनेची माहिती मिळताच गोराई पोलीस घटनास्थळी दाखल झाले आणि घटनेचे गांभीर्य ओळखून नौदलाला पाचारण करण्यात आले. नौदलाच्या मदतीने जहाजात अडकलेले चारही मृतदेह बाहेर काढून पोस्टमार्टमसाठी पाठवण्यात आले आहेत.

हे ही वाचा : सांत्वनपर भेटीवेळी पुर्णेकरांच्या पत्नीने हंबरडा फोडला, उद्धव ठाकरेंचा मोठा शब्द

तीन संशयित ताब्यात

या कारवाईदरम्यान पोलिसांना जहाजाच्या आसपास तीन संशयित आढळले असून त्यांना ताब्यात घेण्यात आले आहे. हे लोक जहाजावर कोणत्या उद्देशाने आले होते आणि या चोरीच्या प्रयत्नात आणखी कोणाचा सहभाग आहे, यादृष्टीने पोलीस त्यांची चौकशी करत आहेत. सध्या पोलिसांनी घटनास्थळाचा पंचनामा केला असून जहाजातील परिस्थितीची बारकाईने पाहणी सुरू आहे. गॅस गळती कशी झाली, चौघांचा मृत्यू नेमका कशामुळे झाला आणि यात इतर सहकाऱ्यांची भूमिका काय होती, या सर्व प्रश्नांची उत्तरे गोराई पोलिसांच्या पुढील तपासानंतरच समोर येतील.