वाशीम : जवानाने गरोदर पत्नीला क्रूरपणे संपवलं, मेहुण्याकडून अनैतिक संबंध असल्याचे आरोप

हेही वाचा : नवरा ICU मध्ये, नवऱ्याचा मृत्यू...,स्मशानभूमीत पहारा; प्रेमविवाहाचा भयानक अंत

लष्करी जवानाचे अवैध संबंध असल्याचा आरोप

मृतका दीपालीच्या भावाने दिलेल्या माहितीनुसार, काल दुपारी सुमारे 3 वाजता लष्करी जवानाने त्याला फोन करून दीपाली घरात पडल्याची माहिती दिली होती. त्यानंतर तिला रुग्णालयात दाखल करण्यात आल्याचे सांगण्यात आले. दीपालीचे कुटुंब मध्य प्रदेशातील बुरहानपूर जिल्ह्यात राहते. ही माहिती मिळाल्यानंतर तिचे कुटुंबीय काल सायंकाळी सुमारे 7 वाजता कारंजा येथे पोहोचले. दीपालीचा भाऊ राहुल माने याने दिलेल्या माहितीनुसार, लष्करी जवानाचे अवैध संबंध असल्याचा आरोप आहे. या कारणावरून तो दीपालीला त्रास देत होता. काही महिन्यांपूर्वी याच विषयावर दोन्ही कुटुंबांची बैठकही झाली होती. त्यावेळी समजूत घालून प्रकरण सोडवण्यात आले होते.

हेही वाचा : पुण्यात आल्यानंतर पहिल्या बॉयफ्रेंडला विसरली, एका प्रियकराने केला दुसऱ्याचा मर्डर

जम्मू-काश्मीरला जाणार होता, पण पत्नीसोबत वाद अन् केली हत्या 

दरम्यान, आरोपी जवान काल जम्मू-काश्मीरला जाणार होता. मात्र, त्यापूर्वी पती-पत्नीमध्ये वाद झाला. या वादातून संतापलेल्या जवानाने पत्नीचा गळा आवळल्याचा आरोप आहे. त्यानंतर त्याने पत्नीला खासगी रुग्णवाहिकेतून एका खासगी रुग्णालयात नेले. मात्र, तेथील डॉक्टरांनी तिला सरकारी रुग्णालयात नेण्यास सांगितले. त्यानंतर दीपालीला सरकारी रुग्णालयात आणण्यात आले. तेथे उपस्थित डॉक्टरांनी महिलेला पाहताच प्रकरण संशयास्पद असल्याचे लक्षात घेतले आणि तातडीने कारंजा पोलिसांना माहिती दिली.

उपविभागीय पोलीस अधिकारी मनीष ठाकरे यांनी दिलेल्या माहितीनुसार, काल सरकारी रुग्णालयाकडून पोलिसांना मेमो मिळाला होता. त्यामध्ये एका महिलेचा मृतदेह रुग्णवाहिकेतून आणल्याची माहिती देण्यात आली होती. पोलीस पथक रुग्णालयात पोहोचले असता मृतदेहाच्या मानेवर स्पष्टपणे खुणा दिसून आल्या. त्यामुळे या प्रकरणात काहीतरी गडबड असल्याचा संशय पोलिसांना आला. त्यानंतर मृतका दीपालीच्या भावाच्या तक्रारीवरून लष्करी जवान आणि त्याच्या आई-वडिलांविरोधात हत्येचा गुन्हा दाखल करण्यात आला. तिन्ही आरोपींना अटक करण्यात आली असून या प्रकरणाचा पुढील तपास सुरू आहे.