Lok Sabha Elections 2024 : शिंदेंच्या 5 ते 6 खासदारांचा पत्ता होणार कट?

Shiv Sena Lok Sabha Candidates : शिवसेनेचे नाशिकचे खासदार हेमंत गोडसे हे आपल्या समर्थकांसह रविवारी (२४ मार्च) मुंबईत आले. मुख्यमंत्री एकनाथ शिंदे यांच्या निवासस्थानाबाहेर त्यांनी शक्तिप्रदर्शन केले. गोडसेंच्या या शक्तिप्रदर्शनाने जी शंका गेल्या काही दिवसांपासून बोलून दाखवली जात होती, ती खरी ठरताना दिसत आहे. गोडसे यांचे तिकीट कापले जाणार असल्याचे बोलले जात असून, गोडसेंबरोबर शिवसेनेच्या 5 ते 6 खासदारांना डच्चू दिला जाणार, असे सांगितले जात आहे. 

मिळालेल्या माहितीनुसार, लोकसभा निवडणुकीच्या पार्श्वभूमीवर लोकसभा मतदारसंघामध्ये सर्व्हे करण्यात आले होते. यात शिवसेनेच्या पाच ते सहा खासदारांच्या मतदारसंघातील सर्व्हे चांगला नसल्याचे समोर आले आहे.

हेही वाचा >> 'बारामतीत भावकीची निवडणूक करणाऱ्यांना मी बघूनच घेतो..' अजितदादांचा सख्ख्या भावाला थेट इशारा? 

शिंदेंच्या शिवसेनेच्या ५ ते ६ खासदारांविरोधात मतदारसंघात वातावरण असून, त्यांना बदलण्याची सूचनाही भाजपकडून देण्यात आल्याची चर्चा राजकीय वर्तुळात होत आहे. त्यादृष्टीने आता हालचाली सुरू झाल्या आहेत. 

राजकीय वर्तुळात ज्या खासदारांच्या नावांची चर्चा आहे, त्यात खालील नावांचा समावेश आहे. 

हेमंत गोडसे, नाशिक लोकसभा मतदारसंघ
भावना गवळी, यवतमाळ-वाशिम लोकसभा
हेमंत पाटील, हिंगोली लोकसभा
कृपाल तुमाने, रामटेक लोकसभा
गजानन कीर्तिकर, मुंबई उत्तर पश्चिम
संजय मंडलिक, कोल्हापूर

नव्या उमेदवारांची चाचपणी

एकनाथ शिंदे यांच्याकडून या जागांवर नवे उमेदवार देण्यासाठी हालचाली सुरू झाल्या आहेत. रामटेक लोकसभा मतदारसंघातून कृपाल तुमाने यांचा पत्ता कट होणार, हे जवळपास निश्चित झाले आहे. काँग्रेसमधून आलेल्या राजू पारवे यांना रामटेक मतदारसंघातून शिवसेनेकडून उमेदवारी दिली जाणार आहे. याची घोषणा होण्याचीच औपचारिकता राहिली आहे. 

नाशिकमध्ये गोडसेंचा पत्ता कट होणार?

खासदार हेमंत गोडसे यांची उमेदवारीही अनिश्चित मानली जात आहे. त्यामुळेच गोडसे यांना मुख्यमंत्री एकनाथ शिंदे यांच्यासमोर शक्तिप्रदर्शन करण्याची वेळ आली, असे स्थानिक पातळीवर बोलले जात आहे. भाजपकडून या जागेवर दावा केला जात आहे, तर दुसरीकडे महायुतीचे उमेदवार म्हणून छगन भुजबळ यांना उतरवण्यासंदर्भातही चर्चा सुरू आहे. त्यामुळे गोडसे अस्वस्थ झाले आहेत.

हेही वाचा >> ''दादा माझा राजीनामा घ्या...'', आढळरावांनी कोल्हेंच्या वर्मावर ठेवलं बोट 

यवतमाळमध्ये उत्सुकता

भावना गवळी यांना पुन्हा उमेदवारी मिळणार की नाही, याबद्दलची अनिश्चितता अजूनही संपलेली नाही. भावना गवळी यांच्याबद्दल मतदारसंघात फारसं अनुकूल वातावरण नसल्याचे पक्षीय सर्व्हेक्षणात दिसून आल्याची माहिती आहे. त्यामुळे एकनाथ शिंदे यांनी पक्षातील नेत्यांना मतदारसंघातील स्थितीचा अंदाज घेण्यासाठीही पाठवले होते. या मतदारसंघातून संजय राठोड यांचे नाव चर्चेत आहे, पण ऐनवेळी दुसरा चेहराही दिला जाऊ शकतो. 

हिंगोली, मुंबई उत्तर पश्चिमच काय?

हेमंत पाटील हे शिवसेनेचे हिंगोलीचे खासदार आहेत. तर गजनान कीर्तिकर लोकसभेत मुंबई उत्तर पश्चिमचे प्रतिनिधित्व करतात. हिंगोलीतील जागेसाठी भाजप आग्रही आहे. हेमंत पाटील यांच्याबद्दल मतदारसंघातील वातावरण चांगले नसल्याचे सर्व्हेमध्ये  दिसून आले. दुसरीकडे अमोल कीर्तिकर यांना उद्धव ठाकरे यांनी उमेदवारी दिली आहे. शिवसेनेमधून गजानन कीर्तिकर यांना उमेदवारी देण्यास विरोध दिसत आहे. रामदास कदम यांनी यावरून कीर्तिकरांना लक्ष्य केले होते. या मतदारसंघातून संजय निरुपम यांना पक्षात घेऊन तिकीट दिले जाऊ शकते. उमेदवारीबद्दल अनिश्चितता निर्माण झाल्यामुळेच काही दिवसांपूर्वी या खासदारांनी एकनाथ शिंदे यांची ठाण्यातील निवासस्थानी भेट घेतली होती.