अशोक चव्हाण, अजित पवारांवर असदुद्दीन ओवेसी बरसले; म्हणाले, "मोदींच्या पायाजवळ बसून..."

अकोला येथे झालेल्या सभेत बोलताना असदुद्दीन ओवेसी म्हणाले, "माझ्या भावानो फक्त मत देणारे बनू नका. बकरी सारखं जगू नका. वाघासारखं जगा. तुम्ही कधीपर्यंत शेळ्यासारखं चालत राहणार. तुम्ही असदुद्दीन ओवैसींपेक्षा चांगले नेता बनू शकतात, फक्त हिंमत निर्माण करा."

एमआयएमचे चार खासदार जिंकून द्या

"येणाऱ्या लोकसभा निवडणुकीत महाराष्ट्रातून तीन चार खासदार जिंकून देणार का? हे ठरवा. महाराष्ट्रातून चार खासदार जिंकून देणार का? जोरात बोला... शिंदेंना माहिती व्हायला हवं. फडणवीसांना कळायला हवं. शरद पवारांना कळायला हवं, अमित शाहांना आणि मोदींना कळायला हवं की, महाराष्ट्रातून एमआयएमचे चार खासदार निवडून येत आहेत", असे आवाहन ओवेसींनी केले.

"अशोकराव (अशोक चव्हाण), जे मला शिव्या द्यायचे... त्यांचे चमचे मला शिव्या द्यायचे... आज मोदींच्या पायाजवळ बसून गपागप चहा पित आहेत.  कालपर्यंत बी टीम... बी टीम बोलणारे आज स्वतःच मोदींच्या जवळ जाऊन राज्यसभेचं सदस्यत्व अशोकराव घेत आहेत", अशा शब्दात ओवेसींनी अशोक चव्हाणांना सुनावले. 

"मला विचारायचं आहे की जे माझ्यावर बी टीम म्हणून आरोप करायचे त्यांना, अरे आरएसएसची खरी टीम तर तुम्ही आहात. कारण मी सत्य सांगत होतो तर तुम्ही माझ्यावर आरोप केले. आता आणखी एक मध्य प्रदेशातील माजी मुख्यमंत्री कमलनाथ... ज्याला इंदिरा गांधींचा तिसरा मुलगा म्हटलं गेलं. तेही मला शिव्या द्यायचे. आता ऐकतोय की, तेही भाजपमध्ये जाणार आहेत. आता सांगा की कोण बी टीम आहे?", असा सवाल ओवेसींनी केला. 

"अजित पवार, अजित पवारांचे चमचे माझ्याकडे बोट दाखवायचे. मी म्हणायचो की यांचे खरे चेहरे ईश्वर दाखवेल. आता अजित पवार कुठे बसले आहेत? आता अजित पवार तिकडे जाऊन बसले आहेत. आता अजित पवार म्हणताहेत की माझ्या पत्नीला माझ्या बहिणीविरुद्ध निवडणूक लढवायला लावेन. आता सांगा की हे महाराष्ट्रात काय चाललं आहे? काँग्रेसचे लोक भाजपत जात आहे", अशी घणाघाती टीका ओवेसींनी अकोल्यातील सभेत केली.

बाबा सिद्दीकींना ओवेसी म्हणाले निर्लज्ज...

बाबा सिद्दीकी यांनी अजित पवार यांच्या राष्ट्रवादी काँग्रेसमध्ये प्रवेश केला. त्यावर ओवेसी म्हणाले, "एक त्यांचा मुंबईतील नेता. एक त्यांचा नेता मोठा नमुना आहे. त्याला फक्त इफ्तारची दावतच लक्षात राहते. बाकी त्याच्या मागे पुढे काही नाही. तेलंगणा निवडणुकीवेळी हैदराबादमध्ये आल्यानंतर म्हणत होता की, असदुद्दीन ओवैसींच्या मतदारसंघात कार्यक्रम करा मी येईन असे म्हणत होता. अरे निर्लज्ज दीड महिन्यात तू भाजपसोबत गेला. कुठे गेली तुमची इमानदारी?", असा  सवाल करत ओवेसींनी भाजपसोबत गेलेल्या राष्ट्रवादी आणि काँग्रेसच्या नेत्यांवर हल्ला चढवला.