उद्धव ठाकरेंना अचानक भेटले CM फडणवीस.. सोबत संजय राऊतही, एकाच विमानातून प्रवास, चर्चा अन्...

उद्धव ठाकरे यांच्यासोबत त्यांचे पुत्र आणि आमदार आदित्य ठाकरे (Aaditya Thackeray), खासदार संजय राऊत (Sanjay Raut)आणि खासदार अनिल देसाई (Anil Desai)हे देखील विमानात उपस्थित होते. विशेष म्हणजे, संजय राऊत आणि मुख्यमंत्री फडणवीस यांच्यातही काही वेळ चर्चा झाल्याची माहिती समोर येत आहे.

उद्धव ठाकरेंच्या दौऱ्याची सुरुवात विदर्भातून

शिवसेना (UBT) मधून सहा खासदार शिंदे गटात गेल्यानंतर पक्ष संघटना मजबूत करण्यासाठी उद्धव ठाकरे तीन दिवसांचा विदर्भ दौरा करत आहेत. या दौऱ्याची सुरुवात यवतमाळमधून होणार असून, नागपूर विमानतळावर उतरल्यानंतर ते थेट यवतमाळकडे रवाना होणार आहेत. फुटलेल्या खासदारांच्या मतदारसंघांमध्ये जाऊन कार्यकर्त्यांना धीर देणे, पक्षाची भूमिका मांडणे आणि नव्याने संघटनबांधणी करणे हा या दौऱ्याचा मुख्य उद्देश मानला जात आहे.

हे ही वाचा>> ठाकरेंचा सहावा खासदार फडणवीसांनी शिंदेंकडे कसा पाठवला? एक शब्द, अन्यथा...

फडणवीसांचाही नागपूर दौरा

दुसरीकडे मुख्यमंत्री देवेंद्र फडणवीस यांनी पुण्याचा दौरा पूर्ण करून मुंबईतून नागपूरकडे प्रस्थान केले. नागपूरमध्ये त्यांचे पुढील दोन दिवस विविध शासकीय आणि राजकीय कार्यक्रम निश्चित आहेत. त्यामुळे योगायोगाने दोन्ही नेते एकाच विमानाने प्रवास करत असल्याने या भेटीकडे सर्वांचे लक्ष लागले.

राजकीय कटुता असतानाही सौजन्याची भेट

गेल्या काही दिवसांपासून शिवसेना (UBT) कडून शिंदे गट आणि भाजपवर सातत्याने टीका केली जात आहे. खासदारांच्या फुटीनंतर दोन्ही बाजूंमध्ये आरोप-प्रत्यारोप तीव्र झाले आहेत. अशा वातावरणात उद्धव ठाकरे आणि देवेंद्र फडणवीस यांनी एकमेकांशी सौजन्याने संवाद साधल्याने राजकीय निरीक्षकांच्या भुवया उंचावल्या आहेत.

हे ही वाचा>> 'Operation Tiger देवेंद्र फडणवीसांच्या मार्गदर्शनात झालं', भाजप आमदाराचा गौप्यस्फोट

राजकारणात वैचारिक मतभेद आणि सार्वजनिक टीका असली, तरी वैयक्तिक पातळीवर संवाद कायम ठेवण्याची परंपरा महाराष्ट्राच्या राजकारणात अनेकदा पाहायला मिळाली आहे. त्यामुळे या भेटीला काहीजण केवळ राजकीय सभ्यता मानत असले, तरी काहीजण यामागे वेगळे राजकीय संकेत शोधण्याचा प्रयत्न करत आहेत.

कोणत्या चर्चांना उधाण?

• या भेटीनंतर राजकीय वर्तुळात अनेक तर्क-वितर्क सुरू झाले आहेत.
• महायुती आणि शिवसेना (UBT) यांच्यातील वाढलेल्या संघर्षाच्या पार्श्वभूमीवर ही केवळ औपचारिक भेट होती की त्यापलीकडे काही संदेश होता?
• खासदार फुटीनंतरच्या बदललेल्या राजकीय परिस्थितीवर दोन्ही नेत्यांमध्ये काही चर्चा झाली का?
• आगामी स्थानिक स्वराज्य संस्था निवडणुका आणि राज्यातील बदलत्या राजकीय समीकरणांच्या पार्श्वभूमीवर या भेटीला काही विशेष महत्त्व आहे का?

बदलत्या राजकारणात प्रत्येक भेट चर्चेचा विषय

महाराष्ट्रात गेल्या काही वर्षांत झालेल्या राजकीय घडामोडींमुळे कोणत्याही मोठ्या नेत्यांची अनपेक्षित भेट लगेच चर्चेचा विषय ठरते. शिवसेनेतील फूट, बदललेली सत्तासमीकरणे, लोकसभा निवडणुकीनंतरचे राजकीय वातावरण आणि नुकत्याच घडलेल्या खासदारांच्या पक्षांतराच्या पार्श्वभूमीवर फडणवीस आणि उद्धव ठाकरे यांची विमानातील भेटही त्याच कारणामुळे चर्चेत आली आहे.

मात्र, उपलब्ध माहितीनुसार ही भेट विमान प्रवासादरम्यान झालेली सौजन्यपूर्ण भेट होती. त्यातून कोणतेही नवे राजकीय समीकरण किंवा निर्णय निश्चित झाल्याचे संकेत अद्याप समोर आलेले नाहीत. तरीही उद्धव ठाकरे यांच्या विदर्भ दौऱ्यातील भाषणे, तसेच पुढील काही दिवसांत महायुती आणि शिवसेना (UBT) कडून येणाऱ्या राजकीय प्रतिक्रिया यावर या भेटीच्या चर्चेचे पुढचे चित्र अवलंबून असेल.