अनेक पुरुषांसोबत अनैतिक संबंधाचा संशय, पत्नीला मित्रामार्फत जमीन दाखवण्यासाठी बोलावलं, अन् भयंकर कांड

पोलिसांच्या माहितीनुसार, मालादेवीच्या नावावर असलेल्या जमिनीच्या व्यवहारातून सुमारे 26 लाख रुपये मिळाले होते. हे पैसे पत्नी आपल्याला देणार नाही, अशी शंका सुबोध शर्माला होती. यासोबतच पत्नीचे अनेक लोकांशी अनैतिक संबंध असल्याचा संशयही त्याला होता. या सर्व कारणांमुळे सुबोधने पत्नीचा काटा काढण्याचा निर्णय घेतला. सुबोध शर्मा हा हॉटेल चालक असून, त्याने आपल्या जुन्या ओळखीतील मित्र कुणाल किशोर याच्यासोबत मिळून हत्या करण्याचा कट रचला.

11 जानेवारी रोजी मालादेवीचा मृतदेह जानीपूर पोलीस ठाण्याच्या हद्दीत आढळून आला होता. याप्रकरणी मृत महिलेच्या वडिलांच्या तक्रारीवरून अज्ञात व्यक्तींविरोधात गुन्हा दाखल करण्यात आला होता. घटनेचे गांभीर्य लक्षात घेता पोलिसांनी तत्काळ तपास सुरू केला. तपासादरम्यान संशयाची सुई कुणाल किशोर याच्याकडे वळली. जहानाबाद रेल्वे स्थानकावरून त्याला अटक करण्यात आली. तो नारायणपूर मुरारी, पाली (जहानाबाद) येथील रहिवासी आहे.

हेही वाचा : 'शाई पुसून गैरकृत्य करणाऱ्यास...', अखेर निवडणूक आयोगाचं स्पष्टीकरण; मार्कर पेनबाबतही भाष्य

अटकेनंतर कुणालची सखोल चौकशी करण्यात आली असता, त्याने हत्येच्या कटात आपली भूमिका कबूल केली. त्याच्या सांगण्यावरून गुन्ह्यात वापरलेला मोबाईल फोन आणि सिमकार्ड पोलिसांनी जप्त केले आहेत. तपासात असेही निष्पन्न झाले की, सुबोध शर्मा आणि कुणाल किशोर यांची जुनी ओळख होती आणि त्याच ओळखीचा फायदा घेत सुबोधने कुणालला या कटात सामील करून घेतले.

सिटी एसपी पश्चिमी भानु प्रताप सिंह यांनी दिलेल्या माहितीनुसार, कुणाल किशोर याने मालादेवीला गाजाचक महम्मदपूर येथे जमीन दाखवण्याच्या बहाण्याने बोलावले होते. या बदल्यात सुबोध शर्माने कुणालकडून पूर्वी घेतलेले सुमारे अडीच लाख रुपयांचे कर्ज परत न मागण्याचे तसेच हत्येनंतर अतिरिक्त पैसे देण्याचे आमिष दाखवले होते. 11 जानेवारी रोजी मालादेवी प्लॉट पाहण्यासाठी त्या ठिकाणी पोहोचली. त्याच वेळी तिथे आधीच सुबोध शर्मा उपस्थित होता. संधी साधत सुबोधने स्वतःच पत्नीच्या डोक्यात गोळी झाडून तिची हत्या केली.या घटनेने परिसरात खळबळ उडाली असून, पोलिसांनी दोन्ही आरोपींना अटक करून पुढील तपास सुरू केला आहे. आर्थिक लोभ आणि संशयातून पत्नीची हत्या केल्याची ही घटना समाजाला हादरवणारी असून, कायद्याचा धाक दाखवण्यासाठी पोलिसांकडून कठोर कारवाई केली जात असल्याचेही अधिकाऱ्यांनी स्पष्ट केले आहे.

इतर महत्त्वाच्या बातम्या 

मार्कर पेनवरून उद्धव ठाकरे यांची निवडणूक आयुक्तांबाबत केली 'ती' मागणी म्हणाले, 'निवडणूक आयुक्तांना...'