मुलगा पार्थ पवारांचं जमीन प्रकरण अन् अजितदादांचं मोठं विधान, 'ती' प्रतिक्रिया जशीच्या तशी...

'मला त्या प्रकरणाबाबत नेमकी माहिती नाही. माझा त्या गोष्टीशी डायरेक्ट अजित पवार म्हणून दुरान्वये देखील संबंध नाही. मी सगळी माहिती घेतो.. आणि उद्या तुमच्यासमोर पुन्हा येतो. पण मी आता बोललो नसतो तर म्हटलं असतं की, कुठेतरी पाणी मुरतं आहे.' असं म्हणत अजित पवारांनी या प्रकरणी कोणतीही नेमकी माहिती दिलेली नाही.

अजित पवारांची प्रतिक्रिया जशीच्या तशी.. 

'सकाळपासून तुम्ही मला काही प्रश्न विचारत होता. मला त्याबद्दल एवढंच सांगायचंय की, जे काही आता मीडियामध्ये सुरू आहे.. त्याबद्दलची पूर्ण माहिती मला नाही. माझा त्या गोष्टीशी डायरेक्ट अजित पवार म्हणून दुरान्वये देखील संबंध नाही. मला  35 वर्ष महाराष्ट्रातील जनता ओळखते. त्या संदर्भात मी उलट यानिमित्ताने संपूर्ण माहिती घ्यायचं ठरवलेलं आहे. कारण मागे एकदा 3-4 महिन्यापूर्वीची गोष्ट असेल. की, अशा-अशा पद्धतीचं काही तरी चाललं आहे. हे कानावर आलं.. त्यावेळेस मी सांगितलं की, असलं काही चुकीचं केलेलं मला चालणार नाही. असल्या कुठल्याही चुकीच्या गोष्टी कोणीही करू नये अशा स्पष्ट सूचना मी दिलेल्या होत्या.'

हे ही वाचा>> 1800 कोटींच्या जागेची 300 कोटींमध्ये खेरदी, स्टॅम्प ड्युटी अवघी 500 रुपये, दानवेंचे अजितदादांच्या मुलावर आरोप

'परंतु त्यानंतर पुन्हा काय झालं ते मला माहिती नाही. पण मीडियामध्ये जमिनीबाबत काही वेगवेगळ्या गोष्टी सांगितल्या जात आहेत. त्याची इत्ंयभूत माहिती, त्याचे कागदपत्रं.. कोणी परवानगी दिली, कोणी नाही दिली.. हे सगळं पाहीन.. मी आपल्याला सांगतो.. मी आजपर्यंत कुठल्याही माझ्या जवळच्या किंवा लांबच्या नातेवाईकांच्या संदर्भात कुठेतरी त्यांना फायदा होण्याकरिता एकाही अधिकाऱ्याला फोन केलेला नाही किंवा सांगितलेलं नाही.' 

'उलट मी या निमित्ताने.. उपमुख्यमंत्री म्हणून अधिकारी वर्गांना आणि सगळ्यांना सांगेन की, माझ्या नावाचा उपयोग करून कोणी चुकीचं करत असेल किंवा नियमात न बसणारं काम करत असेल तर त्याला माझा कोणताही पाठिंबा नसेल. मी फार कायद्याच्या, नियमाच्या चौकटीत राहून काम करणारा कार्यकर्ता आहे. त्यामुळे मला आज कोणी तरी दुपारी दाखवलं की, मुख्यमंत्री म्हणाले की याची चौकशी करतो. जरूर मुख्यमंत्र्यांनी त्याची चौकशी करावी. तो त्यांचा अधिकार आहे.'

'जर उद्या कोणत्याही बाबतीत तक्रार केली तर चौकशी करून त्याची शाहनिशा करणं, त्याच्यातील सत्यता पडताळणं.. आणि त्यामध्ये काय घडलंय हे पाहणं सरकारचं कामच आहे.  मी या प्रकरणाची माहिती घेऊन उद्या तुम्हाला भेटेन. संपूर्ण माहिती घेऊन मी वस्तुस्थिती तुमच्यासमोर मांडेन.'

हे ही वाचा>> मोठी बातमी : तहसिलदार सूर्यकांत येवले यांचे निलंबन, पार्थ पवारांच्या जमीन गैरव्यवहार प्रकरणात मुख्यमंत्र्यांची मोठी कारवाई

'तुम्ही जे काही स्टॅम्प ड्युटी वैगरे म्हणता त्याची शहानिशा करतो ना.. कारण मीच आज अर्थमंत्री म्हणून काम करत असताना कुठल्याही व्यवहारात नियमात वागलं पाहिजे. कोणीही नियमाच्या बाहेर जाऊन काम करता कामा नये याच मताचा मी आहे.'

'तो पत्ता माझ्या घरचा नाही. तो बंगला पार्थ अजित पवारांच्या नावाने आहे. त्यामुळे तो पत्ता त्याचा आहे.'

'मी सगळी माहिती घेतो.. मी आता बोललो नसतो तर म्हटलं असतं की, कुठेतरी पाणी मुरतं आहे. तुम्हाला सगळ्यांना माझा स्वभाव माहिती आहे की, मी कधीही चुकीच्या कामाचं समर्थन केलेलं नाही. चूक झाली तर मी कबूल करतो. पण या प्रकरणात माझा दुरान्वये संबंधही नाही. मी कोणाशी चर्चाही केलेली नाही.' 

'अलीकडच्या काळात तुमच्या-आमच्या घरातील मुलं सज्ञान होतात तेव्हा ते त्यांचे-त्यांचे व्यवसाय करतात. मी पुन्हा-पुन्हा सांगतो की, माझा याच्याशी काही संबंध नाही. मी अतिशय घटनेला मानणारा, कायद्याने चालणारा आणि इतरांना कायद्याने चालावं असा कटाक्षाने प्रयत्न करणारा कार्यकर्ता आहे.' असं अजित पवार यावेळी म्हणाले.