नाशिक : आपच्या उमेदवारावर विरोधी कार्यकर्त्याने बंदूक उगारली, पण स्थानिकांनी त्यालाच दिला चोप, पाहा व्हिडीओ

या प्रकरणात महत्त्वाचा दावा समोर आला असून, बंदूक उगारलेला व्यक्ती हा प्रभागातील माजी नगरसेवक आणि सध्या कारागृहात असलेले प्रकाश लोंढे यांचा कार्यकर्ता असल्याचा आरोप करण्यात येत आहे. या घटनेमुळे राजकीय वर्तुळात मोठी खळबळ उडाली असून, निवडणुकीदरम्यान वाढणाऱ्या गुन्हेगारी प्रवृत्तींबाबत गंभीर चिंता व्यक्त केली जात आहे. अचानक घडलेल्या या घटनेमुळे काही काळ परिसरात भीतीचे वातावरण पसरले. मात्र, उपस्थित नागरिकांनी धाडस दाखवत तात्काळ त्या व्यक्तीला पकडले आणि त्याला चोप दिला.

हेही वाचा : एकनाथ शिंदे यांचा ठाकरे बंधूंना तिखट सवाल म्हणाले, 'ठाकरे बंधू आता का एकत्र आले? बाळासाहेब असताना...'

घटनेची माहिती मिळताच स्थानिक पोलीस घटनास्थळी दाखल झाले. पोलिसांनी जमावाच्या तावडीत सापडलेल्या आरोपीला ताब्यात घेतले असून, त्याच्याकडील बंदूक जप्त करण्यात आली आहे. प्राथमिक तपासात बंदूक खऱ्या स्वरूपाची असल्याची शक्यता वर्तवण्यात येत असून, याबाबत पोलीस अधिक तपास करत आहेत.

‘आप’ पक्षाच्या पदाधिकाऱ्यांनी या घटनेचा तीव्र निषेध केला आहे. संबंधित आरोपींवर कठोर कारवाई करण्याची मागणी करण्यात आली आहे. दरम्यान, या घटनेनंतर प्रभाग 11 मध्ये तणावाचं वातावरण निर्माण झालं होतं. कोणताही अनुचित प्रकार घडू नये यासाठी पोलिसांनी परिसरात बंदोबस्त वाढवला आहे. पोलीस सध्या आरोपीची कसून चौकशी करत असून, तो कोणाच्या सांगण्यावरून हा प्रकार करण्यासाठी आला होता का, याचा तपास सुरू आहे. तसेच प्रकाश लोंढे यांच्याशी या घटनेचा थेट संबंध आहे का? याचीही पडताळणी केली जात आहे. या घटनेमुळे नाशिक महानगरपालिका निवडणुकीदरम्यान कायदा-सुव्यवस्थेचा मुद्दा पुन्हा एकदा ऐरणीवर आला आहे.

इतर महत्त्वाच्या बातम्या 

'फडणवीस म्हणतात अण्णामलाई 'तसं' म्हणालेच नाही ..', राज ठाकरेंकडून लाव रे तो व्हिडिओ.. फडणवीसांवर पडले तुटून!