आधी पवार शिंदेंना भेटले, आता रात्री पाटील 'नंदनवन'वर.. 45 मिनिटांची बैठक अन् चक्रावणारं राजकारण

"नगर विकास खात्यातील आणि माझ्या काही वैयक्तिक कामांसाठी एकनाथ शिंदे यांची भेट घेतली. नगराध्यक्षांच्या अपात्रतेसंदर्भात अपील केल्याचंही त्यांच्या कानावर घातलं."

जयंत पाटील यांनी एवढीच प्रतिक्रिया दिल्याने बैठकीमागील राजकीय अर्थ लावण्याचे प्रयत्न अधिकच वाढले आहेत.

राष्ट्रवादीच्या हालचालींकडे सर्वांचे लक्ष

गेल्या काही दिवसांपासून राष्ट्रवादी काँग्रेस (शरद पवार गट) संदर्भात विविध राजकीय चर्चा सुरू आहेत. पक्ष भविष्यात कोणती राजकीय भूमिका घेणार, महाविकास आघाडीत कायम राहणार की वेगळी रणनीती आखणार, याबाबत सातत्याने तर्क लावले जात आहेत.

हे ही वाचा>> शाहांनी असा कोणता फॉर्म्युला आणला की विरोधक डीलिमिटेशनला तयार होतायत?

अशा परिस्थितीत जयंत पाटील यांनी प्रथम मुख्यमंत्री देवेंद्र फडणवीस आणि त्यानंतर उपमुख्यमंत्री एकनाथ शिंदे यांची घेतलेली भेट राजकीय दृष्ट्या महत्त्वाची मानली जात आहे.

शरद पवार यांच्या हालचालींमुळेही चर्चांना बळ

काही दिवसांपूर्वी राष्ट्रवादी काँग्रेसचे अध्यक्ष शरद पवार यांनीही विधानभवनात एकनाथ शिंदे यांच्या दालनात जाऊन त्यांची भेट घेतली होती. त्या भेटीनंतरही विविध राजकीय चर्चांना उधाण आले होते.

आता त्याच मालिकेत जयंत पाटील आणि जितेंद्र आव्हाड यांची शिंदेंसोबत झालेली बैठक पाहिली जात आहे. त्यामुळे राष्ट्रवादी काँग्रेसची पुढील राजकीय दिशा काय असेल, याबाबत उत्सुकता अधिक वाढली आहे.

एनडीए प्रवेशाच्या चर्चांना पुन्हा हवा?

राजकीय विश्लेषकांच्या मते, या सलग घडणाऱ्या भेटींमुळे राष्ट्रवादी काँग्रेस (शरद पवार गट) आणि महायुती यांच्यातील संबंधांबाबत पुन्हा एकदा चर्चा सुरू झाली आहे. तथापि, सध्या पक्षाकडून एनडीएमध्ये प्रवेशाबाबत कोणतीही अधिकृत घोषणा किंवा पुष्टी करण्यात आलेली नाही. त्यामुळे अशा सर्व चर्चा या केवळ राजकीय तर्क-वितर्कांच्या पातळीवर आहेत.

आगामी काळात राष्ट्रवादी काँग्रेसची भूमिका काय राहते आणि या बैठकींचा पुढील राजकीय घडामोडींवर काय परिणाम होतो, याकडे संपूर्ण महाराष्ट्राचे लक्ष लागले आहे.