हे ही वाचा : महाराष्ट्रात घडणार मोठी उलथापालथ?, 'त्या' एका गोष्टीसाठी एकनाथ शिंदे पुन्हा दिल्लीत?

नोटीशीला समाधानकारक उत्तर नाही

कल्याण-डोंबिवली महानगरपालिका निवडणुकीत ठाकरे गटाचे 11 नगरसेवक निवडून आले होते. मात्र, गेल्या काही दिवसांपासून मधुर म्हात्रे, कीर्ती ढोणे, राहुल कोट आणि स्वप्नाली केणे हे चार नगरसेवक संपर्काबाहेर असल्याने पक्षात अस्वस्थता निर्माण झाली होती. हे चारही नगरसेवक शिंदे गटाच्या संपर्कात असल्याच्या चर्चांनी जोर धरला होता. या पार्श्वभूमीवर पक्षाचे सचिव वरुण सरदेसाई यांनी संबंधित नगरसेवकांना कारणे दाखवा नोटीस बजावली होती. समाधानकारक उत्तर न मिळाल्याने मधुर म्हात्रे यांची हकालपट्टी करण्यात आली.

हकालपट्टीचे पत्र मिळताच एकनाथ शिंदेंची भेट

हकालपट्टीचे पत्र मिळताच मधुर म्हात्रे यांनी तात्काळ एकनाथ शिंदे यांची भेट घेतली आणि आमदार राजेश मोरे यांच्या उपस्थितीत शिंदे गटात प्रवेश केला. हिंदुत्वाचा विचार आणि विकासकामांना चालना देण्यासाठी आपण हा निर्णय घेतल्याचे त्यांनी यावेळी सांगितले.

हे ही वाचा : Personal Finance: तुम्हाला दर महिन्याला मिळतील 60 हजार रुपये, 'हा' गोल्डन फॉर्म्युला विसरू नका!

तीन नगरसेवकांनी ठाकरे गटाच्या नेत्यांची भेट घेतली

दरम्यान, बेपत्ता असलेल्या उर्वरित तीन नगरसेवकांनी पुन्हा ठाकरे गटाच्या नेत्यांची भेट घेत आपली निष्ठा मातोश्रीशी असल्याचे स्पष्ट केले. आम्ही वैयक्तिक कारणांमुळे बाहेर होतो, आमच्याबद्दल चुकीच्या अफवा पसरवल्या गेल्या, असे राहुल कोट यांनी सांगितले. त्यामुळे ठाकरे गटाचे संख्याबळ आता 10 वर स्थिरावले आहे.

मधुर म्हात्रे यांच्या पक्षांतरामुळे आता कायदेशीर लढाई रंगण्याची शक्यता आहे. ठाकरे गटाचे गटनेते उमेश बोरगावकर आणि प्रतोद संकेत भोईर यांनी म्हात्रे यांना अपात्र ठरवण्यासाठी विभागीय आयुक्तांकडे धाव घेतली आहे. जर त्यांचे नगरसेवक पद रद्द झाले, तर संबंधित प्रभागात पोटनिवडणूक होण्याची शक्यता निर्माण झाली आहे.