मोठी बातमी: ठाकरे, पवार थेट डोंबिवलीत.. शिंदेंचे नगरसेवक रमेश म्हात्रेंना अटक

ठाकरे आणि पवारांचा थेट डोंबिवली दौरा

दरम्यान, मारहाणीच्या या घटनेनंतर वैद्यकीय क्षेत्रातून तीव्र संताप व्यक्त करण्यात आला होता. डॉक्टरांवरील वाढत्या हल्ल्यांच्या पार्श्वभूमीवर या प्रकरणाने राज्यभरात मोठे पडसाद उमटले होते. दुसरीकडे याच प्रकरणी आमदार आदित्य ठाकरे यांनी थेट विधानसभेत मुद्दा उपस्थित केला होता. तर त्यानंतर काही वेळातच आदित्य ठाकरेंनी थेट डोंबिवलीत जाऊन रुग्णालयातील कर्मचाऱ्यांची विचारपूस केली होती. तसेच रमेश म्हात्रेंवर कारवाई न झाल्यास आंदोलनाचा इशारा दिला होता.

आदित्य ठाकरेंशिवाय राष्ट्रवादी काँग्रेस (शरद पवार) पक्षाचे आमदार रोहित पवार यांनी देखील डोंबिवलीमधील शास्त्रीनगर रुग्णालयाला भेट दिली होती. तसंच मारहाण झालेल्या डॉक्टर आणि कर्मचाऱ्यांकडून नेमकी घटना काय घडली ते समजून घेतलं होतं.

नेमकं काय घडलं होतं?

दोन दिवसांपूर्वी डोंबिवलीतील शास्त्रीनगर रुग्णालयात उपचारादरम्यान झालेल्या वादातून नगरसेवक रमेश म्हात्रे आणि त्यांच्या समर्थकांनी रुग्णालयात गोंधळ घातल्याचा आरोप आहे. यावेळी महिला डॉक्टर तसेच इतर काही कर्मचाऱ्यांना धक्काबुक्की आणि मारहाण करण्यात आल्याचे सांगितले जाते.

हे ही वाचा>> "रमेश म्हात्रेंना अटक करा अन्यथा..", रोहित पवारांचा सरकारला थेट इशारा

घटनेचे काही व्हिडिओ सोशल मीडियावर व्हायरल झाल्यानंतर या प्रकरणाची राज्यभर चर्चा सुरू झाली. डॉक्टरांच्या विविध संघटनांनी या घटनेचा तीव्र निषेध करत आरोपींवर कठोर कारवाईची मागणी केली होती.

डॉक्टर संघटनांचा आंदोलनाचा इशारा

महिला डॉक्टरवर झालेल्या हल्ल्यानंतर राज्यातील विविध वैद्यकीय संघटनांनी निषेध व्यक्त केला होता. सरकारी तसेच खासगी रुग्णालयांतील डॉक्टरांनी सुरक्षिततेचा मुद्दा उपस्थित करत दोषींना तातडीने अटक करण्याची मागणी केली होती. कारवाई न झाल्यास आंदोलनाचा इशाराही देण्यात आला होता.

हे ही वाचा>> ‘एक डॉक्टर म्हणून मी…’, महिला डॉक्टरला मारणाऱ्या शिंदेंच्या नगरसेवकावर श्रीकांत शिंदेंची वक्रदृष्टी

पोलिसांची कारवाई

या प्रकरणी विष्णुनगर पोलीस ठाण्यात गुन्हा दाखल करण्यात आला होता. त्यानंतर पोलिसांनी तपास सुरू ठेवत पुरावे, सीसीटीव्ही फुटेज आणि संबंधितांचे जबाब नोंदवले. तपासानंतर नगरसेवक रमेश म्हात्रे यांना अटक करण्यात आली असून पुढील तपास सुरू आहे.

राजकीय वातावरणही तापले

रमेश म्हात्रे हे मुख्यमंत्री एकनाथ शिंदे यांच्या शिवसेनेचे नगरसेवक असल्याने या घटनेला राजकीय रंगही चढला. विरोधकांनी कायदा-सुव्यवस्थेचा प्रश्न उपस्थित करत सरकारवर टीका केली, तर सत्ताधारी पक्षाकडून तपासानंतर योग्य ती कायदेशीर कारवाई होईल, अशी भूमिका मांडण्यात आली.

प्रकरणाची पार्श्वभूमी

• डोंबिवलीतील शास्त्रीनगर रुग्णालयात उपचारादरम्यान वाद झाल्याचा आरोप.
• महिला डॉक्टर आणि रुग्णालयातील कर्मचाऱ्यांना मारहाण झाल्याची तक्रार.
• घटनेचे व्हिडिओ समोर आल्यानंतर राज्यभर संताप.
• डॉक्टर संघटनांकडून निषेध आणि आरोपींना अटक करण्याची मागणी.
• विष्णुनगर पोलीस ठाण्यात गुन्हा क्रमांक 195/26 दाखल.
• भारतीय न्याय संहिता (BNS) कलम 132 आणि 121(1) अंतर्गत गुन्हा नोंद.
• तपासानंतर नगरसेवक रमेश म्हात्रे यांना अटक; पुढील तपास सुरू.

सध्या पोलिसांकडून या प्रकरणातील इतर संबंधित व्यक्तींची भूमिकाही तपासली जात असून, तपासानुसार पुढील कायदेशीर कारवाई केली जाणार आहे.